அவிநாசி: அவிநாசி ஸ்ரீ கருணாம்பிகை உடனமர் அவிநாசி லிங்கேஸ்வரர் கோவிலில் பரிவார சன்னதிகளுக்கு, 23ம் தேதி பாலாலயம் நடைபெறுகிறது.

கொங்கேழு சிவஸ்தலங்களில் முதன்மையான சிவாலயமாக விளங்கும் ஸ்ரீ கருணாம்பிகை உடனமர் அவிநாசி லிங்கேஸ்வரர் கோவிலில்,வரும் 23ம் தேதி மாலை 6 மணிக்கு மேல் 7:30 மணிக்குள்,பரிவார சன்னதி விமானங்களுக்கு பாலாலயம் நடைபெறுகிறது. முன்னதாக,அவிநாசி லிங்கேஸ்வரர் கோவிலில்,மஹா கும்பாபிஷேகத்திற்கான திருப்பணிகள் தொடங்கி,கருணாம்பிகை அம்மன் சந்ததியின் ஐந்து நிலை ராஜகோபுரம் மராமத்து பராமரிப்பு பணிகளில் வண்ணம் தீட்டும் வேலை நடைபெற்று வருகின்றது. அதனை தொடர்ந்து,பரிவார சன்னதிகளான செல்வவிநாயகர், வீரபத்ரர், பாதிரி மரத்து அம்மன், சிவசூரியன், தட்சிணாமூர்த்தி,கன்னிமூல கணபதி,சகஸ்ர லிங்கம், பஞ்சபூதலிங்கம், மகாலட்சுமி, செந்தில் ஆண்டவர், சண்டிகேஸ்வரர்,காலபைரவர், நடராஜர், பாலதண்டாயுதபாணி, நிருதிதி விநாயகர்,சண்டிகேஸ்வரி,துர்க்கை அம்மன் ஆகிய சன்னதிகளின் விமானங்களுக்கு பாலாலய பூஜை நடைபெறுகின்றது. ஹிந்து சமய அறநிலையத்துறை ஏற்பாட்டில்,ஆதீன கர்த்தர்கள், உபயதாரர்கள், முக்கிய பிரமுகர்கள், அறங்காவலர் குழு உறுப்பினர்கள் மற்றும் பக்தர்கள் நிகழ்ச்சியில் கலந்து கொள்கின்றனர்.