மேலுார்,மேலுார் அருகே வீரசூடாமணிபட்டியில் மழை பெய்து எல்லா வளமும் கிடைக்க வேண்டி ஆடு, சேவல்களை காணிக்கையாக கொடுத்து மக்கள் நேர்த்திக்கடன் செலுத்தினர்.

இங்குள்ள ஐந்து முழி அழகி ஆத்தாள் கோயில் திருவிழாவை முன்னிட்டு பக்தர்கள் எட்டு நாட்கள் காப்பு கட்டி விரதமிருந்தனர். நிறைவு நாளான நேற்று கச்சிராயன்பட்டி, வீரசூடாமணிபட்டி உள்ளிட்ட கிராமத்தினர் ஆடுகள், 800க்கும் மேற்பட்ட சேவல்களை காணிக்கையாக கொடுத்தனர். அதை தொடர்ந்து மண் பானையில் ஆடு, சேவல் கறிகளை வைத்து அதன் மேல் வேப்பிலையை போட்டு உப்பு போடாமல் அவித்து, மழை பெய்து எல்லா வளமும் கிடைக்க வேண்டி அம்மனுக்கு படையலிட்டனர். அதற்கு முன்பாக மத நல்லிணக்கத்தை வலியுறுத்தும் விதமாக கிராமத்து சார்பில் வாங்கப்பட்ட சர்க்கரையை, இஸ்லாமியர் சர்க்கரை வழங்கும் பாறையில் வைத்து தொழுகை நடத்தி பின்னர் பக்தர்களுக்கு வழங்கினார். பிறகு காணிக்கை கொடுத்தவர்களுக்கு படையலிடப்பட்ட பிரசாதம் பிரித்து கொடுக்கப்பட்டது. வேப்பிலையை போட்டு சமைத்தாலும் அம்மனுக்கு படையல் இடுவதால் கசக்காது என்பது குறிப்பிடத்தக்கது.