திருப்பதி: ஆந்திர மாநிலம், நெல்லூரைச் சேர்ந்த பக்தர் குடும்பத்தினருடன் திருமலை ஏழுமலையான் கோயிலில் தரிசனம் செய்ய, பாதயாத்திரையாகச் சென்றுபோது, திருப்பதி அலிபிரி மலைப்பாதையில் கடந்த வெள்ளிக்கிழமை அக்குடும்பத்தைச் சேர்ந்த 6 வயது சிறுமி சிறுத்தை தாக்கி உயிரிழந்தார். இதனால் சிறுத்தையை பிடிப்பதற்காக திருமலை திருப்பதி தேவஸ்தானம் மற்றும் வனத்துறை இணைந்து பல்வேறு இடங்களில் கூண்டுகள் வைத்தனர். இதில், கடந்த திங்கள்கிழமை ஒரு சிறுத்தை சிக்கிய நிலையில், இன்று மேலும் ஒரு சிறுத்தை சிக்கியுள்ளது என வனத்துறை அதிகாரிகள் தெரிவித்துள்ளனர். 50 நாட்களுக்குள் இதுவரை மூன்று சிறுத்தைகள் பிடிக்கப்பட்டுள்ளதாக அதிகாரிகள் தெரிவித்தனர். திருப்பதி தேவஸ்தானம் மலைப்பாதையில் பாதுகாப்பு ஏற்பாடுகளை அதிகரித்துள்ளது.