பரமக்குடி; பரமக்குடி சுந்தரராஜ பெருமாள் கோயிலில் பகல்பத்து உற்சவம் நேற்று துவங்கியது.

பெருமாள் கோயில்களில் டிச., 23 வைகுண்ட ஏகாதசி விழா கொண்டாடப்பட உள்ளது. இதன் தொடக்கமாக அத்யயன உற்சவம் எனப்படும் பகல்பத்து துவங்கியது. தொடர்ந்து பத்து நாட்கள் நடக்கும் விழாவையொட்டி, பெருமாள் ஏகாந்த சேவையில் தாயார் மண்டபத்தில் காலை 9:00 மணிக்கு எழுந்தருளினார். அங்கு பாகவதர்கள் பஜனை பாடல்களை பாடினர். தொடர்ந்து திருநெடுந்தாண்டகம் அர்ச்சகர்களால் வாசிக்கப்பட்டது.

பின்னர் பெருமாளுக்கு மகாதீப ஆராதனை நடந்து, ஏகாதசி மண்டபத்தில் பன்னிரு ஆழ்வார்கள் சந்நதியில் தீர்த்தம், சடாரி சேவை சாதிக்கப்பட்டு, காலை 11:00 மணிக்கு தீபாராதனை காண்பிக்கப்பட்டது. பின்னர் பிரசாதங்கள் வழங்கப்பட்டன. இதேபோல் தினமும் நாலாயிர திவ்ய பிரபந்தங்கள் வாசிக்கப்படும். 10 வது நாளான டிச., 22 மாலை 5:00 மணிக்கு பெருமாள் மோகினி அவதாரத்தில் வீதி உலா வருகிறார். இக்கோயிலில் பெருமாள் வடக்கு நோக்கி அருள்பாலிக்கும் நிலையில், இங்கு வைகுண்ட வாசல் வழியாகவே தினமும் பக்தர்கள் சுவாமி தரிசனம் செய்வது சிறப்பு ஆகும். இதன்படி மாலை 6:00 மணிக்கு நடை அடைக்கப்பட்டு, மறுநாள் காலை 5:00 மணிக்கு, சர்வ அலங்காரத்துடன் வைகுண்ட வாசல் திறக்கப்பட்டு பெருமாள், பக்தர்களுக்கு அருள்பாலிப்பார். அன்று இரவு தொடங்கி 10 நாட்கள் இராப்பத்து உற்சவம் துவங்கி நடக்க உள்ளது. ஏற்பாடுகளை சுந்தரராஜ பெருமாள் தேவஸ்தான டிரஸ்டிகள் செய்துள்ளனர்.