ஊட்டி; ஊட்டி முத்தநாடு மந்து தோடர் பழங்குடியினர் கோவிலில் மாநில கவர்னர் ஆர்.என். ரவி, தனது மனைவியுன் சுவாமி தரிசனம் செய்து, மக்களிடம் கலந்துரையாடினார்.

மாநில கவர்னர் ஆர்.என். ரவி, தனது மனைவி லட்சம் ரவியுடன் நேற்று நீலகிரி மாவட்டம், ஊட்டிக்கு வருகை தந்தார். கலெக்டர் அருணா மற்றும் நீலகிரி எஸ்.பி., சுந்தரவடிவேல் ஆகியோர் வரவேற்றனர். ஊட்டி ராஜ்பவனில் தங்கியுள்ள கவர்னர், தனது மனைவியுடன், இன்று காலை, 11:00 மணிக்கு, ஊட்டி தலைகுந்தா அருகே உள்ள தோடர் பழங்குடியினர் மக்கள் வாழும் முத்தநாடு மந்து கிராமத்திற்கு சென்றார். அவருக்கு, தோடர் மக்கள் சார்பில், வரவேற்பு அளிக்கப்பட்டது. அங்குள்ள ஸ்ரீ தேக்கிஸ் அம்மன் கோவிலுக்கு சென்று, சுவாமி தரிசனம் செய்தார். பிறகு, கிராம இளைஞர் இளவட்ட கல் தூக்கியதை பார்வையிட்டு மகிழந்தார். கோவை இந்துஸ்தான் கல்லூரி மாணவர்கள் மற்றும் கிராம மக்களுடன் கலந்துரையாடினார். தோடர் பழங்குடியினர் பெண்கள் காட்சிப்படுத்திய கைவினை பொருட்களை பார்வையிட்டார். தோடர் மக்களின் பாரம்பரிய நடனத்தை ரசித்த கவர்னர், அவர்களுடன் இணைந்து நடனமாடினார். மக்களிடம் கலந்துரையாடுகையில், இயற்கை பாதுகாக்கப்பட வேண்டும். கடந்த, 50 ஆண்டுகளுக்கு முன்பு இருந்த சூழல் தற்போது இல்லை. கடந்த, 10 ஆண்டுகளில் இயற்கை பெருமளவில் அழிக்கப்பட்டு வருகிறது. இயற்கையை பாதுகாப்பதில், பழங்குடியின மக்களின் பங்கு மகத்தானது. அதனால்தான், தோடர் பழங்குடியின மக்கள் வாழும் கிராமத்திற்கு விரும்பி வந்துள்ளேன். இங்கு வந்தது எனக்கு மகிழ்ச்சியான தருணம் என்றார்.