திருக்கோவிலூர்; திருக்கோவிலூர் உலகளந்த பெருமாள் கோவிலில் பிரம்மோற்சவ விழாவின் மூன்றாம் நாளான நேற்று அதிகாலை மூலவர் உலகளந்த பெருமாள் விஸ்வரூப தரிசனத்தில் பக்தர்களுக்கு அருள் பாலித்தார். தொடர்ந்து நித்திய பூஜை நடந்தது. 7:30 மணிக்கு சூரிய பிரபை வாகனத்தில் ஸ்ரீதேவி பூதேவி சமேத தேகளீச பெருமாள் எழுந்தருளி வீதி உலா நடந்தது. தொடர்ந்து சுவாமி வானமாமலை ஜீயர் மடத்திற்கு எழுந்தருளி திருவாய்மொழி, சேவை சாற்றுமறை, பிரசாத விநியோகம் செய்யப்பட்டது. மாலை 5:00 மணிக்கு வசந்த மண்டபத்தில் பெருமாள் ஊஞ்சல் சேவையில் பக்தர்களுக்கு அருள் பாலித்தார். இரவு 8:00 மணிக்கு வெள்ளி அனுமந்த வாகனத்தில் ஸ்ரீ தேகளீச பெருமாள் எழுந்தருளி வான வேடிக்கையுடன் வீதி உலா நடந்தது. ஜீயர் தேகளீச ராமானுஜாச்சாரியார் சுவாமிகள் தலைமையில் நடைபெற்ற விழாவில் ஏராளமான பக்தர்கள் கலந்து கொண்டனர். கோவில் ஏஜென்ட் கிருஷ்ணன் விழாவிற்கான ஏற்பாடுகளை செய்திருந்தார்.