இளையான்குடி; இளையான்குடி அருகே தாயமங்கலத்தில் உள்ள முத்துமாரியம்மன் கோயில் பங்குனி பொங்கல் விழாவில் ஏராளமான பக்தர்கள் பொங்கல் வைத்து தீச்சட்டிகள் கரும்பாலை தொட்டில் செலுத்தி ஆடு, கோழிகளை பலியிட்டு நேர்த்திக் கடன்களை செலுத்தி அம்மனை வழிபட்டனர். நாளை இரவு 7:10 மணிக்கு மேல் மணிக்கு மேல் மின் அலங்கார தேர் பவனி நடைபெற உள்ளது.

இளையான்குடி அருகே தாயமங்கலத்தில் உள்ள பிரசித்தி பெற்ற முத்துமாரியம்மன் கோயிலில் வருடம் தோறும் பங்குனி மாதம் பொங்கல் விழா தொடர்ந்து 10 நாட்கள் நடைபெறுவது வழக்கம். இந்த விழாவின்போது தமிழகத்தின் அனைத்து பகுதிகளிலிருந்தும் ஏராளமான பக்தர்கள் வந்திருந்து தீச்சட்டி, கரும்பாலை தொட்டில், ஆயிரங்கண் பானை, முடி காணிக்கை செலுத்துதல் உள்ளிட்ட பல்வேறு வேண்டுதல்களை நிறைவேற்றி ஆடு, கோழிகளை பலியிட்டுச் செல்வதை வழக்கமாகக் கொண்டுள்ளனர்.இந்தாண்டிற்க்கான திருவிழா கடந்த 28ம் தேதி இரவு 10:50 மணிக்கு கொடியேற்றத்துடன் துவங்கியது. விழாவின் முக்கிய நிகழ்ச்சியான பங்குனி பொங்கல் விழா இன்று நடைபெற்றது. நேற்று இரவு முதலே தாயமங்கலத்தில் பக்தர்கள் குவிந்த வண்ணம் இருந்தனர். இதனைத் தொடர்ந்து இன்று அதிகாலை முதல் ஏராளமான பக்தர்கள் தெப்பக்குளத்தில் நீராடிவிட்டு பொங்கல் வைத்து தீச்சட்டிகள், ஆயிரம் கண் பானை,கரும்பாலை தொட்டில், பால்குடங்கள் போன்றவற்றை ஏந்தி கொண்டு கோயிலை சுற்றி வலம் வந்து அம்மனை வழிபட்டனர். பின்னர் ஆடு கோழிகளை பலியிட்டு நேர்த்திக்கடன்களை நிறைவேற்றினர் பொங்கல் விழாவை முன்னிட்டு தமிழக முழுவதிலும் இருந்து ஏராளமான பக்தர்கள் வருகை தந்ததால் கோவிலில் அதிகளவு கூட்டம் இருந்ததையொட்டி பக்தர்கள் நீண்ட வரிசையில் காத்திருந்து அம்மனை வழிபட்டு சென்றனர். நாளை இரவு 7: 10 மணிக்கு மேல் மின் அலங்கார தேரோட்டமும், 6ம் தேதி காலை 7:40 மணிக்கு பால்குடம் நிகழ்ச்சியும், மாலை 5 மணிக்கு ஊஞ்சல் உற்சவம் நிகழ்ச்சியும் இரவு 10 மணிக்கு புஷ்ப பல்லாக்கும் நடைபெற உள்ளது.7ம் தேதி கோயில் தீர்த்தவாரி நிகழ்ச்சியுடன் திருவிழா நிறைவு பெறுகிறது. விழாவை ஒட்டி மானாமதுரை, சிவகங்கை,இளையான்குடி, மதுரை, அருப்புக்கோட்டை,காரைக்குடி உள்ளிட்ட பல்வேறு ஊர்களிலிருந்து சிறப்பு பஸ்கள் இயக்கப்பட்டு வருகின்றன. விழாவிற்கான ஏற்பாடுகளை பரம்பரை அறங்காவலர் வெங்கடேசன் மற்றும் கோயில் பணியாளர்கள் செய்து வருகின்றனர்.