புனர்பூசம்: நல்லகாலம் வந்தாச்சு

தனக்காரகனான குருவின் நட்சத்திரத்தில் நீங்கள் பிறந்திருந்தாலும் முதல் 3 பாதங்களில் (மிதுனம்) பிறந்தவர்களுக்கு வித்யாகாரகன் புதன் ராசி நாதனாகவும், 4ம் பாதத்தினருக்கு (கடகம்) மனக்காரகனான சந்திரன் ராசி நாதனாகவும் உள்ளனர்.

பிறக்கும் குரோதி ஆண்டில் புனர்பூசம் 1,2,3 ம் பாதத்தில் பிறந்தவர்களுக்கு முயற்சிக்கேற்ப பலன் கிடைக்கும். புதிய முயற்சிகளில் வெற்றியும், எதிர்பார்த்த வருமானமும் கிடைக்கும். எதிரி தொல்லை விலகும். வெளிநாடு செல்வீர்கள். தொழிலில் லாபம் அதிகரிக்கும். 4ம் பாதத்தில் பிறந்தவர்களுக்கு வீட்டில் சுபநிகழ்ச்சி நடக்கும். விரும்பிய யாவும் வந்து சேரும். தகுதிக்கேற்ற பொறுப்பு, பதவி உயர்வு ஏற்படும். பிறரால் முடியாததையும் முடித்துக் காட்டுவீர்கள்.

சனி சஞ்சாரம்
கும்பத்தில் ஆட்சியாக சஞ்சரிக்கும் சனி, தாரா பலன்களால் 4 பாதங்களில் பிறந்தவர்களுக்கும் அதிர்ஷ்ட பலன் தருவார். தொட்டதெல்லாம் வெற்றி, முயற்சியெல்லாம் லாபம் என்ற நிலை உண்டாகும். விருப்பம் நிறைவேறும். 1,2,3 ம் பாதங்களில் பிறந்தவர்களுக்கு முயற்சி கைகூடும்.  புதிய தொழில் மூலம் லாபம் காண்பீர்கள். எதிர்பார்த்த முன்னேற்றம் ஏற்படும். வருமானம் அதிகரிக்கும். செல்வாக்கு உயரும். 4ம் பாதத்தினருக்கு 2024, ஜூன் 19 - நவ. 4 வக்கிர காலத்திலும், 2025, பிப். 27 - மார்ச் 29  அஸ்தமன காலத்திலும் நெருக்கடி விலகும். ஆரோக்கியம் சீராகும்.  வசதி வாய்ப்பு அதிகரிக்கும்.

ராகு, கேது சஞ்சாரம்
 ராகு மீனத்திலும், கேது கன்னியிலும் சஞ்சரிக்கும் நிலையில் 1,2,3ம் பாதங்களில் பிறந்தவர்களுக்கு தொழில், வியாபாரம் லாபகரமாக இருக்கும். வெளிநாட்டு முயற்சி ஆதாயம் தரும். தொழில் தொடங்குவதற்காக எதிர்பார்த்த பணம் வரும். குடும்பத்தில் முன்னேற்றம் உண்டாகும். ஆரோக்கியம் சீராகி சுறுசுறுப்பாக செயல்படுவீர்கள். 4ம் பாதத்தில் பிறந்தவர்களுக்கு நீண்டநாள் விருப்பம் நிறைவேறும். பணியிடத்தில் ஏற்பட்ட பிரச்னை விலகும். துணிச்சலுடன் செயல்படும் நிலை உண்டாகும். சகோதரர், பணியாளர்கள் ஒத்துழைப்பர்.  

குரு சஞ்சாரம்
ஏப். 30 வரை 1,2,3 ம் பாதங்களில் பிறந்தவர்களுக்கு லாப குருவால்  வருமானம் உயரும். முன்னேற்றம் ஏற்படும். மே 1 முதல் விரய ஸ்தானத்தில் சஞ்சரிப்பதால் செலவு கூடும். அலைச்சல் உண்டாகும். கடன் அதிகரிக்கும். ஆனால் உடல்நிலை சீராகும். வம்பு, வழக்குகள் தீரும். 4ம் பாதத்தில் பிறந்தவர்களுக்கு ஏப்.30 வரை ஜீவன ஸ்தானத்தில் சஞ்சரிக்கும் குருவால் தொழிலில் மந்தநிலை ஏற்படும். வருமானத்தில் தடை, பணியில் பிரச்னை உருவாகும்.  மே 1 முதல் லாப ஸ்தானத்தில் சஞ்சரிப்பதால் பணவரவு கூடும். செல்வாக்கு உயரும். தொழில், குடும்பம், உத்தியோகத்தில் யோகமும் அளிப்பார். திருமண யோகம், குழந்தை பாக்கியத்தை தருவார். வேலைக்காக முயற்சித்தவர்கள் நல்ல வேலைவாய்ப்பு பெறுவர்.

சூரிய சஞ்சாரம்
புனர்பூசம் 1,2,3 ம் பாதங்களில் பிறந்தவர்களுக்கு 2024, ஏப்.14 - மே13, ஆக.17 - செப். 16, நவ. 16 - டிச. 15, 2025 மார்ச் 15 - ஏப்.13 காலங்களிலும், 4ம் பாதத்தில் பிறந்தவர்களுக்கு 2024, ஏப்.14 - ஜூன் 14, செப்.17 - அக்.17, டிச. 16 - 2025, ஜன. 15 காலத்திலும் செல்வாக்கை உயர்த்துவார். தனித்திறனை வெளிப்படுத்துவார். வழக்குகளில் சாதகமான முடிவு கிடைக்கும். அரசியல்வாதிகளுக்கு புதிய பதவி, பொறுப்பு கிடைக்கும். அரசு ஊழியருக்கு விரும்பிய இடமாற்றம், பணி உயர்வு கிடைக்கும்.


பொதுப்பலன்
நெருக்கடி நீங்கும். முயற்சியில் வெற்றி, கடன் பிரச்னை தீரும். வேலையில் உண்டான பிரச்னைகள் முடிவிற்கு வரும். இழுபறி வழக்குகள் சாதகமாகும். வியாபாரம், தொழிலில் ஏற்பட்ட தடைகள் விலகும். லாபம் அதிகரிக்கும். பொருளாதாரம் உயரும். செல்வாக்கு அதிகரிக்கும்.

தொழில்
மருத்துவம், குடிநீர், உணவுப்பொருள், ஏற்றுமதி, இறக்குமதி, திரைப்படம், சின்னத்திரை, இயந்திரத் தொழிற்சாலை, வியாபார நிறுவனம், எலக்ட்ரிக்கல், கம்ப்யூட்டர், விவசாயம், ரியல் எஸ்டேட், பில்டர்ஸ் தொழில்கள் முன்னேற்றம் பெறும். வழக்கறிஞர், பத்திர எழுத்தாளர், கதாசிரியர்கள், பத்திரிகையாளர்களின் நிலை உயரும். எதிர்பார்த்த லாபம் உண்டாகும்.

பணியாளர்கள்
திறமைக்கு மதிப்பில்லை, என்ன தான் உழைத்தாலும் உயர்வில்லை என வருத்தப்பட்டு வந்த நிலை இனி மாறும். பணிபுரியும் இடத்தில் உங்கள் உழைப்பிற்கு மதிப்புண்டாகும். சிலருக்கு புதிய பொறுப்பு வந்து சேரும். வருமானம் அதிகரிக்கும்.

பெண்கள்
வேலைக்காக முயற்சித்தவர்களின் செயல் வெற்றியாகும். சுயதொழில் செய்பவர்களுக்கு முன்னேற்றம் உண்டாகும். அலுவலகத்தில் மதிப்பு அதிகரிக்கும். உடல் பாதிப்புகள் விலகும். கணவர், குடும்பத்தினரின் பாராட்டை பெறுவீர்கள். திருமண வயதினருக்கு தகுதியான வரன் வரும். குழந்தை பாக்கியத்திற்காக ஏங்கியவர்களின் கனவு நனவாகும். பிள்ளைகளால் பெருமை சேரும்.

கல்வி
பொதுத்தேர்வில் எதிர்பார்த்த மதிப்பெண் வரும். உயர்கல்வி கனவு நிறைவேறும். சிலர் மேற்கல்விக்காக வெளி மாநிலம், வெளி நாட்டுக்குச் செல்வர்.

உடல்நிலை
உடல்பாதிப்புகள் கொஞ்சம் கொஞ்சமாக விலகும். விபத்து, நோய் என படுக்கையில் இருந்தவர்கள் சிகிச்சையால் எழுந்து நடமாடத் தொடங்குவர். சிலருக்கு மூச்சுத்திணறல், நரம்புப் பிரச்னை ஏற்பட்டு குணமாகும்.

குடும்பம்
குடும்பத்தில் இருந்த சங்கடங்கள் நீங்கும். சொத்து சேர்க்கை உண்டாகும்.சுப நிகழ்ச்சிகள் நடந்தேறும். பிள்ளைகளின் திருமணத்தை நடத்துவீர்கள். புதிய வாகனம், வீடு என நீண்டநாள் கனவு நிறைவேறும். உறவினர் ஆதரவு அதிகரிக்கும். தம்பதியர் ஒருவரை ஒருவர் புரிந்து கொண்டு செயல்படுவர்.