அவிநாசி; பிளேக் மாரியம்மன் கோவிலில் 112ம் ஆண்டு பூச்சாட்டு விழாவை முன்னிட்டு, தீச்சட்டி ஏந்தி ஊர்வலமாக பக்தர்கள் சென்றனர்.

அவிநாசி பிளேக் மாரியம்மன் கோவில் வீதியில் எழுந்தருளியுள்ள பிளேக் மாரியம்மன் கோவில் 112ம் ஆண்டு பூச்சாட்டு விழா கடந்த பத்தாம் தேதி காப்பு கட்டுதல், கம்பம் நடுதலுடன் துவங்கியது. அதனைத் தொடர்ந்து நாள்தோறும் சிறப்பு அபிஷேக ஆராதனைகள், அம்மன் திருவீதி உலா, சிம்ம வாகனத்தில் அம்மன் எழுந்தருளி பக்தர்களுக்கு காட்சியளித்தல், தீர்த்த குடம் எடுத்து வருதல் ஆகியவை நடைபெற்றது. இன்று பூச்சாட்டு விழாவில் மாவிளக்கு எடுத்து வருதல், பொங்கல் வைத்தல், ஆகியவற்றுடன் அவிநாசி லிங்கேஸ்வரர் கோவிலில் இருந்து தீச்சட்டி கரகம் ஏந்தி பக்தர்கள் ஊர்வலமாக கோவிலுக்கு சென்றனர். நாளை (வெள்ளி), மஞ்சள் நீராட்டுடன் பூச்சாட்டு விழா நிறைவு பெறுகின்றது. 112ம் ஆண்டு பூச்சாட்டு விழாவை முன்னிட்டு கோவில் கமிட்டி சார்பில் பக்தர்களுக்கு அன்னதானம் வழங்கப்பட்டது.