ஸ்ரீவில்லிபுத்தூர்; ஸ்ரீவில்லிபுத்தூரில் சித்ரா பவுர்ணமியை முன்னிட்டு ஆண்டாள், ரெங்க மன்னார் ஆற்றில் இறங்கும் வைபவம் இன்று கோலாகலமாக நடந்தது.

இதனை முன்னிட்டு இன்று காலை கோயிலில் ஆண்டாள், ரெங்கமன்னாருக்கு சிறப்பு அலங்காரம், பூஜைகள் நடந்தது. பின்னர் இருவரும் பச்சை பட்டு உடுத்தி ஆண்டாள் சேஷ வாகனத்திலும், ரெங்கமன்னார் குதிரை வாகனத்திலும் எழுந்தருளினர். காலை 9:05 மணிக்கு கோயிலில் இருந்து புறப்பட்ட ஆண்டாள், ரெங்க மன்னார் மாடவீதி, மேலரத வீதிகள் வழியாக ஆத்துக்கடை சந்திப்பு வந்தனர். அப்போது ஏராளமான பக்தர்கள் எதிர்கொண்டு வரவேற்றனர். அங்கு காலை 10:45 மணிக்கு ஆற்றில் இறங்கும் வைபவம் நடந்தது. அப்போது ஆண்டாளை, ரெங்க மன்னார் மூன்று முறை சுற்றிவரும் வையாளி சேவை நடந்தது திரளான பக்தர்கள் தரிசனம் செய்தனர். விழா ஏற்பாடுகளை அறங்காவலர் குழு தலைவர் வெங்கட்ராம ராஜா தலைமையில் கோயில் பட்டர்கள், ஊழியர்கள் செய்திருந்தனர். ஸ்ரீவில்லிபுத்தூர் இன்ஸ்பெக்டர் சங்கர் கண்ணன் தலைமையில் ஏராளமான போலீசார் பாதுகாப்பு பணியில் ஈடுபட்டனர்.