ஆர்.எஸ்.மங்கலம்; இளையான்குடி அருகே நடைபெற்ற சாத்தனூர் மகா சாத்தையனார் கோயில் கும்பாபிஷேக விழாவில் ஏராளமான பக்தர்கள் கலந்து கொண்டு தரிசனம் செய்தனர்.

சிவகங்கை மாவட்டம், இளையான்குடி அருகே சாத்தனூர் மகா சாத்தையனார் கோயில் கும்பாபிஷேகம் நடைபெற்றது. பழமை வாய்ந்த இக்கோயில், புதுப்பிக்கப்பட்டதை தொடர்ந்து இன்று காலை 10:00 மணிக்கு கோபுர கலசத்தில் புனித நீர் ஊற்றப்பட்டு, கும்பாபிஷேக விழா நடைபெற்றது. முன்னதாக, ஜூன் 16ல் முகூர்த்தக்கால் நடும் விழா நடந்தது. ஜூலை 1 ல், கணபதி ஹோமம், வாஸ்து சாந்தி, கோ பூஜை நடந்தன. அதைத் தொடர்ந்து நேற்று நான்கு காலை யாக சாலை பூஜைகள் நடைபெற்றன. விழாவின் தொடர்ச்சியாக, இன்று காலை 9:00 மணிக்கு பூர்ணா குதி யாகசாலை பூஜைகள் நடைபெற்று, கடம் புறப்பாடு நடைபெற்றது. யாகசாலையில் இருந்து ஊர்வலமாகச் சென்ற சிவாச்சாரியார்கள், காலை 10:05 மணிக்கு, மூலஸ்தான கருவறை கோபுர கலசம், ராஜகோபுர கலசம் ஆகியவற்றில் புனித நீர் ஊற்றி கும்பாபிஷேகம் நடைபெற்றது. தொடர்ந்து மூலவர் மற்றும் பரிவார தெய்வங்களுக்கு புனித நீர் ஊற்றப்பட்டு அபிஷேகம் செய்யப்பட்டு, தீப ஆராதனை காண்பிக்கப்பட்டன. இதில் ஏராளமான பக்தர்கள் கலந்து கொண்டனர். விழாவில், கோயில் அறங்காவலரும், சாத்தையா மில் ஸ்டோர் உரிமையாளருமான தர்மராஜன், இந்து அறநிலை துறை ஆய்வாளர் அய்யனார், என்.எஸ்.பி.குரூப் ஆப் கம்பெனி செல்வன், அறங்காவலர் குழு தலைவர் கிருத்திகா கபில் மனோஜ், அறங்காவலர் முருகேசன் உட்பட பலர் கலந்து கொண்டனர்.