மானாமதுரை; மேற்கு வங்க மாநிலம் கொல்கத்தாவிலிருந்து தமிழகம் வந்த பக்தர்கள் மதுரையிலிருந்து ராமேஸ்வரத்திற்கு தீர்த்த கலயங்களை பாதயாத்திரையாக மானாமதுரை வழியாக கொண்டு சென்றனர்.

மேற்கு வங்க மாநிலம் கொல்கத்தாவிலிருந்து குருஜி பிண்டு மண்டூல் தலைமையிலான 32 நபர்கள் கடந்த 15 ம் தேதியில் கிளம்பி ரயில் பயணம் வழியாக விஜயவாடா வந்து அங்கிருந்து ருந்து மதுரை வந்தடைந்தனர். இன்று மதுரை மீனாட்சி அம்மனை தரிசனம் செய்த பிறகு அங்கிருந்து பாதயாத்திரையாக மதுரை வைகை ஆற்றில் தீர்த்தங்களை எடுத்து தோளில் சுமந்து கொண்டு மானாமதுரை வழியாக ராமேஸ்வரத்திற்கு பாதயாத்திரையாக சென்று அங்கு பூஜைகளை செய்த பிறகு ராமநாத சுவாமியை வழிபட உள்ளதாக தெரிவித்தனர்.இது குறித்து குருஜி பிண்டு மண்டூல் கூறியதாவது, தமிழகத்தின் கோயில் நகரமாக விளங்கக்கூடிய மதுரை மீனாட்சி அம்மனை தரிசனம் செய்த பிறகு புண்ணிய தீர்த்தமான வைகை ஆற்றில் தீர்த்தத்தை எடுத்து தோளில் சுமந்து கொண்டு பாதயாத்திரையாக மானாமதுரை வழியாக ராமேஸ்வரம் சென்று ராமநாத சுவாமியை வழிபட்ட பிறகு அங்கிருந்து தனுஷ்கோடி, கன்னியாகுமரி சென்று கடலில் தீர்த்தம் எடுத்துக்கொண்டு ஆந்திராவில் உள்ள மல்லிகார்ஜூன கோயிலுக்கு சென்று வழிபட்ட பின்னர் மத்திய பிரதேச மாநிலத்தில் உள்ள மகா காலேஸ்வர கோயிலுக்கு செல்ல இருப்பதாகவும், முக்கிய நதிகள் மற்றும் கடலில் எடுக்கப்படும் தீர்த்தங்களை கொண்டு சுவாமியை தரிசனம் செய்த பிறகு அந்த தீர்த்தங்களோடு சொந்த ஊர் திரும்ப உள்ளதாக தெரிவித்தார்.மேலும் செல்லும் வழியில் ஆங்காங்கே கூடாரம் அமைத்து சமைத்து சாப்பிட்டு செல்வதாகவும் கூறினார்.