கீழக்கரை; கீழக்கரை அருகே மாயாகுளம் ஊராட்சிக்குட்பட்ட தொண்டாலை மேலக்கரையில் உள்ள ஆதி பெரியாண்டவர், அப்பாண்டவர் கோயிலில் கடந்த ஜூன் 2 அன்று புதியதாக திருப்பணிகள் செய்யப்பட்டு கும்பாபிஷேகம் நடந்தது. 48 நாட்கள் நிறைவிற்கு பிறகு நேற்று காலை 7:00 மணிக்கு விக்னேஸ்வர பூஜை உள்ளிட்ட யாகசாலை பூஜைகள் நடந்தது. யாக வேள்வி குடங்களில் புனித நீர் பூஜிக்கப்பட்டு மூலவர்கள் செல்வகணபதி, பாலமுருகன், பெரியாண்டவர், அப்பாண்டவர் உள்ளிட்ட பரிவார தெய்வங்களுக்கு அபிஷேகம் நடந்தது. மண்டல பூஜைகளை தொடர்ந்து சிறப்பு அலங்கார தீபராதனைகள் நிறைவேற்றப்பட்டது. பக்தர்களுக்கு அன்னதானம் வழங்கப்பட்டது.கோயில் விழாக்கமிட்டி செயலாளர் ஆசிரியர் (ஓய்வு) எஸ்.ராமலிங்கம், தொண்டாலை மேலக்கரை கிராம மக்கள் ஏற்பாடுகளை செய்திருந்தனர்.