மானாமதுரை; சிவகங்கை சமஸ்தானம் தேவஸ்தானம் நிர்வாகத்துக்குட்பட்ட மானாமதுரை வீர அழகர் கோயிலில் வருடம் தோறும் ஆடி பிரம்மோற்ஸவ விழா தொடர்ந்து 10 நாட்கள் நடைபெறும்.இந்த நாட்களின் போது சுவாமி பரங்கி நாற்காலி,பல்லக்கு,குதிரை, சிம்மம் உள்ளிட்ட பல்வேறு வாகனங்களில் மண்டகப் படிகளுக்கு எழுந்தருளி பக்தர்களுக்கு காட்சியளிக்க உள்ளார். இந்தாண்டுக்கான விழா கடந்த 13ம் தேதி கொடியேற்றத்துடன் துவங்கியது .இதனைத் தொடர்ந்து விழா நாட்களின் போது சுவாமி வீதி உலா நடைபெற்றது.நேற்று விழாவின் முக்கிய நிகழ்ச்சியான தேரோட்டத்திற்காக மாலை 6:30 மணிக்கு வீர அழகர் ஸ்ரீதேவி ,பூதேவியருடன் சர்வ அலங்காரங்களுடன் அலங்கரிக்கப்பட்ட தேருக்கு எழுந்தருளினார்.இதனைத் தொடர்ந்து பூஜைகள் நடைபெற்ற பின்னர் தேர் நான்கு ரத வீதிகளின் வழியே வலம் வந்து கோயிலை வந்தடைந்தது பின்னர் தீபாராதனை காட்டப்பட்டது. நாளை பட்டத்தரசி கிராம மண்டகப்படியில் தீர்த்தவாரி உற்சவ நிகழ்ச்சி நடைபெற உள்ளது. விழாவிற்கான ஏற்பாடுகளை தேவஸ்தான மேலாளர் இளங்கோ,கண்காணிப்பாளர் சீனிவாசன்,அர்ச்சகர் கோபி மாதவன்(எ) முத்துச்சாமி ஆகியோர் செய்து வருகின்றனர்.