பாலக்காடு; விநாயகர் விசர்ஜன ஊர்வலம் பாலக்காட்டில் விமரிசையாக நடந்தது. கேரள மாநிலம் பாலக்காடு மாவட்டத்தில், நேற்று முன்தினம் விநாயகர் சதுர்த்தி விழா கொண்டாடப்பட்டது. தாரேக்காடு நீராட்டு கணபதி கோவில், மந்தகரை மகா கணபதி கோவில், சாத்தபுரம் பிரசன்ன மகா கணபதி கோவில், கொடுவாயூர் ஆலமரத்தடி கணபதி கோவில் ஆகிய முக்கிய கோவில்களில் சிறப்பு வழிபாடு நடந்தது. பல்வேறு இடங்களில், இந்து அமைப்புகள் சார்பில் விநாயகர் சிலைகள் பிரதிஷ்டை செய்யப்பட்டது. நேற்று மதியம் விநாயகர் சிலை விசர்ஜன ஊர்வலம் நடந்தது. யானைகள் அணிவகுப்புடன், 250க்கும் மேற்பட்ட விநாயகர் சிலைகள் ஊர்வலத்தில் எடுத்து வரப்பட்டது. பாலக்காடு பெரிய கடை வீதி, பி.ஓ.சி., சாலை, முனிசிபல் பஸ் ஸ்டாண்ட், ஜி.பி., ரோடு, சுல்தான்பேட்டை, தலைமை தபால் அலுவலகம், விக்டோரியா சாலை, சேகரிபுரம் வழியாக, வந்த ஊர்வலம் சென்று கல்பாத்தி ஆற்றில் சிலைகள் விசர்ஜனம் செய்யப்பட்டன. மாலையில் பெய்த கன மழையை பொருட்படுத்தாமல், ஏராளமான பக்தர்கள் விசர்ஜன ஊர்வலத்தை காண திரண்டு வந்திருந்தது குறிப்பிடத்தக்கது. விநாயகர் விசர்ஜன ஊர்வலத்தையொட்டி, பலத்த போலீஸ் பாதுகாப்பு போடப்பட்டிருந்தது.