பெரியகுளம்; பெரியகுளம் வணிக வைசியகுல சங்கத்தில் நடந்த பிட்டு திருவிழாவில் ஏராளமான பக்தர்கள் பங்கேற்றனர்.

பெரியகுளம் தென்கரை வணிக வைசியகுல அபிவிருத்தி சங்கத்தில் 44 வது ஆண்டு பிட்டு திருவிழாவை முன்னிட்டு, பாலசுப்பிரமணியர் கோயிலில் இருந்து உற்ஸவர்கள் சொக்கநாதர் பிரியாவிடை அம்மன், மீனாட்சியம்மன், சண்டிகேஸ்வரர், விநாயகர் வணிகவைசிய குல சங்கத்தில் எழுந்தருளினர். அர்ச்சகர் துரைக்கண்ணன் பேசுகையில்: வணிகவைசியர் சமுதாயத்தைச் சேர்ந்தவர் சிவபக்தை வந்திபாட்டி. மதுரை வைகையாற்றில் வெள்ளப்பெருக்கில் கரை உடைந்தது. பாண்டிய மன்னன் கரையை உயர்த்த ஒவ்வொருவரும் ஒரு பகுதியை உயர்த்த வேண்டும் என உத்தரவிட்டார். வந்திபாட்டிக்கு சிவபெருமான் சிறுவன் வேடத்தில் வேலையாளாக வந்தார். அவரிடம் கூலிக்கு பதிலாக உதிர்ந்த பிட்டினை உண்டார். வைகையாற்று கரையில் வேலை செய்யாமல் ஆட்டம், பாட்டமாக இருந்துள்ளார். இதனை கண்ட பாண்டிய மன்னன், அவரை பிரம்பால் அடித்துள்ளார். உலகத்தில் அனைவருக்கும் பிரம்பு அடி விழுந்தது. மன்னர், சிவபெருமனை வணங்கினார்.இதனை வலியுறுத்தி அர்ச்சகர்கள் பிட்டுக்கு மண் சுமந்த லீலையை நடத்தினர். சுவாமி, அம்மன் அலங்கரிக்கப்பட்டு நகரின் முக்கிய வீதிகளில் வீதி உலா நடந்தது. பத்தாம் வகுப்பு, பிளஸ் 2 வில் அதிக மதிப்பெண் பெற்ற மாணவர்களுக்கு பரிசுகள் வழங்கப்பட்டன. பக்தர்களுக்கு பிட்டு பிரசாதம், அன்னதானம் வழங்கப்பட்டது. ஏற்பாடுகளை தலைவர் பாலசுப்பிரமணியன், செயலாளர் மணிவண்ணன், பொருளாளர் கணேசன், அலுவலர் சரவணக்குமார் உட்பட ஏராளமானோர் பங்கேற்றனர்.