பதிவு செய்த நாள்
27
செப்
2024
05:09
பல்லடம்; பல்லடம், சந்தைப்பேட்டை ஐயப்பன் கோவில் மண்டல பூஜை நிறைவு விழா நடந்தது. பல்லடம் என்.ஜி.ஆர்., ரோட்டில், சந்தைப்பேட்டை ஐயப்பன் கோவில் உள்ளது. ஐயப்ப பக்தர்கள் குழுவினர் கோவிலை நிர்வாகித்து, பராமரித்து வருகின்றனர். கடந்த ஆக., 29 அன்று கோவில் கும்பாபிஷேகம் விமர்சையாக நடந்தது. இதையடுத்து, தினசரி மண்டல பூஜை நடந்து வருகிறது. இதன் நிறைவு விழா நேற்று நடந்தது. இதை முன்னிட்டு, காலை 10.00 மணிக்கு விநாயகர் பூஜை, கணபதி ஹோமம் ஆகியவை நடைபெற்றன. தொடர்ந்து, கலசாபிஷேகம், மகா தீபாராதனை நடந்தன. கன்னிமூல கணபதி, மஞ்சமாதா ஆகிய மூர்த்திகளுக்கும் சிறப்பு அபிஷேக, ஹோம பூஜைகள் நடந்தன. இதையடுத்து, சிறப்பு முத்தங்கி அலங்காரத்தில் மூலவர் ஐயப்பன் பக்தர்களுக்கு அருள்பாலித்தார். விழாவில் பங்கேற்ற பக்தர்கள் அனைவருக்கும், ஐயப்ப பக்தர்கள் குழு சார்பில் அன்னதானம் வழங்கப்பட்டது.