சபரிமலை; சபரிமலையில் இந்த ஆண்டுக்கான மண்டல காலம் நிறைவு கட்டத்தை நெருங்கியுள்ளது. டிச., 26-ல் நடைபெறும் மண்டல பூஜைக்கான ஏற்பாடு நடைபெற்று வருகிறது. பக்தர்கள் கூட்டம் அதிகரித்து நெரிசல் ஏற்படாமல் இருக்க, ஆன்லைன் முன்பதிவு எண்ணிக்கையில் கட்டுப்பாடு விதிக்கப்பட்டுள்ளது.

டிச., 25-ல், 50,000 பேரும், டிச., 26-ல், 60,000 பேரும் அனுமதிக்கப்படு கின்றனர். இரு நாட்களிலும், ‘ஸ்பாட் புக்கிங்’ எண்ணிக்கை, 5,000 ஆக குறைக்கப்பட்டுள்ளது. மண்டல பூஜை தினத்தில் அய்யப்பனுக்கு அணிவிப்பதற்காக, திருவிதாங்கூர் மன்னர் சித்திரை திருநாள் மகாராஜா வழங்கிய தங்க அங்கி, அன்று காலை, 6:00 மணிக்கு ஆரன்முளா பார்த்தசாரதி கோவிலில் இருந்து பவனியாக புறப்படுகிறது.

டிச., 25 மதியம் பம்பை வந்தடையும். மாலை 6:30-க்கு தங்க அங்கி அணிவித்து தீபாராதனை நடைபெறும். டிச., 26 மதியம் 12:00-க்கு நடைபெறும் மண்டல பூஜையிலும் இந்த அங்கி அய்யப்பன் விக்ரகத்தில் அணிவிக்கப்பட்டிருக்கும். தங்க அங்கி வருகையை ஒட்டி டிச., 25 மதியம், 1:00 வரை மட்டும் பக்தர்கள் சன்னிதானம் செல்ல அனுமதிக்கப்படுவர். அதன் பின், தங்க அங்கி புறப்பட்டு சன்னிதானம் வந்து சேர்ந்த பின்னரே பம்பையில் இருந்து பக்தர்கள் மலையேற அனுமதிக்கப்படுவர் என, அறிவிக்கப்பட்டுள்ளது.