திருப்புவனம்; திருப்புவனம் அருகே லாடனேந்தல் பூங்காவனம் முத்துமாரியம்மன் கோயில் முன் முள்படுக்கையில் பெண் சாமியாரின் தவக்கோலத்தை காண ஏராளமான பக்தர்கள் குவிந்தனர். 

லாடனேந்தலில் பிரசித்தி பெற்ற பூங்காவனம் முத்துமாரியம்மன் கோயில் அமைந்துள்ளது. வெள்ளி, செவ்வாய், ஞாயிறு கிழமைகளில் பக்தர்கள் கூட்டம் அலைமோதும், பௌர்ணமி,அமாவாசை தினங்களில் சிறப்பு பூஜைகள் நடைபெறும், முத்துமாரியம்மனுக்கு நாகராணி அம்மையார் 57, என்பவர் தினசரி பூஜைகள் செய்து வருகிறார். ஒவ்வொரு வருடமும் மார்கழி மாத மண்டல பூஜை மிகவும் பிரசித்தி பெற்றது. இந்தாண்டு மண்டல பூஜையை முன்னிட்டு நேற்று காலை முத்துமாரியம்மன் சிறப்பு அலங்காரத்தில் எழுந்தருளினார். காலை ஒன்பது மணி முதல் சிறப்பு பூஜைகள் தொடங்கின. மண்டல பூஜையை முன்னிட்டு மார்கழி 18ம் தேதி 45 நாட்கள் விரதமிருந்து நாகராணி அம்மையார் முள் படுக்கையில் அமர்ந்து பக்தர்களுக்கு காட்சியளிப்பது வழக்கம். இதற்காக கோயில் முன் ஏழு அடி உயரத்தில் கத்தாழை, சப்பாத்தி கள்ளி, உடைமுள் , கருவேல மர முள் உள்ளிட்டவைகளால் ஏழு அடி உயரத்திற்கு முள் படுக்கை தயார் செய்யப்பட்டது. நேற்று காலை நாகராணி அம்மையார் புனித நீராடி விநாயகரை வழிபட்ட பின் முத்துமாரியம்மனுக்கு சிறப்பு பூஜைகள் செய்து கோயிலை வலம் வந்தார். முள் படுக்கைக் அபிஷேகம் செய்து தீபாராதனை காட்டப்பட்ட பின்பக்தர்களின் கோஷத்தின் இடையே நாகராணி அம்மையார் முள் படுக்கையில் ஏறி அமர்ந்து சாமியாடி தவம் செய்தார். லாடனேந்தல், திருப்புவனம் மற்றும் சுற்றுவட்டார கிராமங்களைச் சேர்ந்த ஏராளமான பக்தர்கள் பெண் சாமியார் முள்படுக்கையில் தவம் செய்யும் காட்சியை தரிசனம் செய்ய வருகை தந்திருந்தனர். மண்டல பூஜையை முன்னிட்டு வரும் 14ம் தேதி பூக்குழி இறங்கும் வைபவம் நடைபெற உள்ளது. விழாவிற்கான ஏற்பாடுகளை சோமசுந்தரம், முத்துராமலிங்கம் உள்ளிட்ட பக்தர்கள் செய்திருந்தனர்.