ராமேஸ்வரம்; ராமேஸ்வரம் கோயில் அக்னி தீர்த்த கடற்கரையில் படிக்கட்டுகள் சேதமடைந்து உள்ளதால், பக்தர்கள் அவதிப்படுகின்றனர்.

ராமேஸ்வரம் ராமநாதசுவாமி கோயிலுக்கு தினமும் ஏராளமான வட, தென் மாநில பக்தர்கள் வருகின்றனர். பக்தர்கள் முதலில் அக்னி தீர்த்த கடலில் நீராடி விட்டு கோயில் வளாகத்தில் உள்ள 22 தீர்த்தங்களை நீராடி தரிசனம் செய்கின்றனர். பக்தர்கள் நலன் கருதி அக்னி தீர்த்த கடற்கரை அழகுபடுத்திட மத்திய அரசு ரூ. 2 கோடி வழங்கியது. இதன் மூலம் அக்னி தீர்த்த கரை அருகில் நடைமேடை, ஓலைக்குடாவில் பூங்கா, பக்தர்கள் உடைமாற்றும் அறை, குடிநீர் மையம் அமைத்தனர். இதில் அக்னி தீர்த்த கடற்கரையில் சிமெண்ட் சிலாப்பில் படிக்கட்டுகள் அமைத்தனர். வடகிழக்கு பருவ சீசனில் எழும் ராட்சத அலைக்கு, இந்த படிக்கட்டுகள் உடைந்து போகும் என ஹிந்து அமைப்பினர் வலியுறுத்தியும் நகராட்சி அதிகாரிகள் கண்டு கொள்ளவில்லை. இந்நிலையில் சேதமடைந்து கிடக்கும் படிக்கட்டுகளை அகற்றாததால், இதன்வழியாக புனித நீராட செல்லும் வயது மூத்த பக்தர்கள், பெண்கள், குழந்தைகள் இடறி விழுந்து காயமடைகின்றனர். அக்னி தீர்த்த கடற்கரை இயற்கையான மணல் பரப்புடன் இருக்க, உடைந்து கிடக்கும் படிக்கட்டுகளை அகற்றிட மாவட்ட நிர்வாகம் நடவடிக்கை எடுக்க வேண்டும் என பக்தர்கள் தெரிவித்தனர்.