திருப்பரங்குன்றம்; திருப்பரங்குன்றம் மலை மேல் தர்கா நிர்வாகம் ஆக்கிரமித்துள்ள சுனையை மீட்க கோரி சுப்பிரமணிய சுவாமி கோயில் துணை கமிஷனர் சூரிய நாராயணனிடம் ஹிந்து மக்கள் கட்சி மாவட்ட தலைவர், திருப்பரங்குன்றம் மலை பாதுகாப்பு இயக்க ஒருங்கிணைப்பாளர் சோலை கண்ணன் மனு அளித்தார்.

அவர் கூறியதாவது: திருப்பரங்குன்றம் சுப்பிரமணிய சுவாமி கோயிலுக்கு சொந்தமான முருகப்பெருமான் மலைமீது 11க்கும் மேற்பட்ட சுனைகள் உள்ளன. அனைத்தும் புனித தீர்த்தங்கள் அடங்கியவை. அதில் தர்காவிற்கு கீழ்ப்பகுதியில் உள்ள சுனையை சுற்றிலும் காம்பவுண்ட் சுவர் எழுப்பியும், இரும்பு வேலி அமைத்தும் தர்கா நிர்வாகம் சுனை முழுவதையும் ஆக்கிரமித்து, ஹஜ்ரத் சுல்தான் சிக்கந்தர் பாதுஷா தர்கா குடிநீர் என போர்டும் வைத்துள்ளனர்.‌ இச்செயல் வன்மையாக கண்டிக்கத்தக்கது. சுப்பிரமணிய சுவாமி கோயிலுக்கு சொந்தமான சுனையை ஆக்கிரமித்து அபகரிக்கும் முயற்சியில் தர்கா நிர்வாகம் ஈடுபட்டுள்ளது. இதுவும் எதிர்காலத்தில் பெரிய சர்ச்சையாகவும், பிரச்னையாகவும் மாற அதிக வாய்ப்புகள் உள்ளது.‌ எனவே புராண காலத்து வரலாற்று சிறப்புமிக்க தொன்மையான சுனையை ஆக்கிரமிப்பாளர்களின் பிடியிலிருந்து மீட்கவும், கோயிலுக்கு சொந்தமான சுனையை வேண்டுமென்றே திட்டமிட்டு ஆக்கிரமித்து, அபகரிப்பில் ஈடுபட்ட தர்கா நிர்வாகத்தின் மீது சட்டப்படியாக நடவடிக்கை எடுக்கவும், மலை மீதுள்ள அனைத்து சுனைகளையும் கோயில் நிர்வாகம் பாதுகாக்க வேண்டும் என புகார் அளித்துள்ளேன். துணை கமிஷனர் ஆய்வு செய்து நடவடிக்கை எடுப்பதாக தெரிவித்துள்ளார். இதுகுறித்து கலெக்டர், தொல்லியல் துறை, ஆர்.டி.ஓ., தாசில்தார், மதுரை போலீஸ் கமிஷனர் திருப்பரங்குன்றம் போலீஸ் இன்ஸ்பெக்டர், அறநிலையத்துறை கமிஷனருக்கும் புகார் மனு பதிவு தபாலில் அனுப்பப்பட்டுள்ளது. அரசு நிர்வாகங்கள் விரைந்து நடவடிக்கை எடுக்க வேண்டும் என்றார்.