மயிலம்: மயிலம் சுப்பிரமணிய சுவாமி கோவிலில் நடந்த ஆங்கில புத்தாண்டு தின சிறப்பு வழிபாட்டில் ஆயிரக்கணக்கான பக்தர்கள் சுவாமி தரிசனம் செய்தனர்.மயிலத்தில் உள்ள வள்ளி தெய்வானை சமேத சுப்பிரமணிய சுவாமி திருக்கோவிலில், ஆங்கிலப் புத்தாண்டையொட்டி சிறப்பு வழிபாடு நேற்று நடந்தது.இதற்காக நேற்று காலை 6 மணிக்கு கோவில் நடை திறக்கப்பட்டு கோவில் வளாகத்தில் உள்ள விநாயகர், பாலசித்தர், வள்ளி தெய்வானை, சுப்ரமணிய சுவாமிகளுக்கு சிறப்பு அபிஷேக, ஆராதனை நடந்தது.இதனைத் தொடர்ந்து மகா தீபாராதனையுடன் நடந்த வழிபாட்டில், ஆயிரக்கணக்கான பக்தர்கள் கலந்து கொண்டு சுவாமி தரிசனம் செய்தனர். மூலவர் தங்க கவச அலங்காரத்தில் பக்தர்களுக்கு அருள்பாலித்தார்.பிற்பகல் 1 மணிக்கு கோவில் மண்டபத்தில் அன்னதானம் வழங்கினர். இரவு 8 மணிக்கு மலர்களினால் அலங்கரிப்பட்ட உற்சவர் கிரிவலம் வந்தார்.இதில் ஏராளமான பக்தர்கள் கலந்து கொண்டனர். விழா ஏற்பாடுகளை மயிலம் 20ம் பட்ட ஆதினம் சிவஞானபாலய சுவாமிகள் மற்றும் கோவில் நிர்வாகத்தினர் செய்திருந்தனர்.