மதுரை: மதுரையில், அனைத்து உயிர்களுக்கும் படியளக்கும் வகையில், நாளை(ஜன.,5) அஷ்டமி சப்பரத்தில் மீனாட்சி அம்மனும், சுவாமி சுந்தரேஸ்வரரும் வீதி உலா வருகின்றனர். ஒரு சமயம் உலகத்தில் உள்ள அனைத்து உயிர்களுக்கும் படியளப்பதற்காக சிவபெருமான் புறப்பட்டார். அவரை சோதிக்க நினைத்த அம்மன், பாத்திரத்தில் எறும்பு ஒன்றை அடைத்து வைத்தார். எல்லா உயிர்களுக்கும் படி அளந்த திருப்தியில் திரும்பிய சிவபெருமானிடம், ஒரு உயிருக்கு மட்டும் நீங்கள் படியளக்கவில்லை, என்றார் அம்மன். பாத்திரத்தை திறந்து பார்த்தபோது, அந்த எறும்புக்கு அருகிலும் அரிசி இருந்தது. இதை நினைவு கூறும் வகையில், மார்கழி தேய்பிறை அஷ்டமி நாளில், சுவாமியும், அம்மனும், மதுரை நகர் வீதிகளின் வழியாக அனைத்து உயிர்களுக்கும் படி அளக்கும் வகையில் உலா வருவது வழக்கம். இந்நிகழ்ச்சி நாளை நடக்கிறது.  அதிகாலை கோயிலில் இருந்து இருவரும் புறப்பாடாகி, கீழமாசிவீதிக்கு வருகின்றனர். அங்கு சப்பரங்களில் எழுந்தருளி, யானைக்கல், வடக்கு வெளிவீதி, கீழவெளிவீதி, தெற்கு வெளி வீதி, திருப்பரங்குன்றம் ரோடு, மேலவெளிவீதி, குட்ஷெட் தெரு, நாயக்கர் புதுத்தெரு, வக்கீல் புதுத்தெரு, கீழமாரட்வீதி, காமராஜர் ரோடு, விளக்குத்தூண் வழியாக தேரடிக்கு வருகின்றனர். வரும் வழியில், ஜீவராசிகளுக்கு படியளப்பதற்காக, பக்தர்கள் ரோட்டின் இருபுறமும் அரிசியை தூவ உள்ளனர்.