அன்னூர்; சென்னையில் துவங்கி 700 கி.மீ., தூரம் பயணித்து, 500 கிராமங்கள் வழியாக அன்னூர் வந்த ஈஷா யோக மைய ரதத்திற்கு மன்னீஸ்வரர் கோயிலில் வரவேற்பு அளிக்கப்பட்டது

கோவை, வெள்ளியங்கிரி மலை அடிவாரத்தில் உள்ள ஈஷா யோக மையத்தில் வருகிற, 15ம் தேதி மகா சிவராத்திரி விழா கோலாகலமாக கொண்டாடப்பட உள்ளது. பல நாடுகளில் இருந்தும் பல லட்சம் பக்தர்கள் வருகை தர உள்ளனர். மகா சிவராத்திரி குறித்து மக்களிடம் விழிப்புணர்வு ஏற்படுத்த, 13வது ஆண்டாக சென்னையிலிருந்து ஈஷா யோக மையத்திற்கு ரதம் கடந்த ஜன. 15ம் தேதி புறப்பட்டது. ஒன்பது மாவட்டங்களில், 500 கிராமங்கள் வழியாக, 700 கி.மீ., தூரம் பயணித்து, நேற்றுமுன்தினம் மாலை கோவை மாவட்டம் வந்தது. பசூரில் தன்னார்வலர்கள், பக்தர்கள் வரவேற்பு அளித்தனர். ரதத்துடன் 63 நாயன்மார்கள் சிலைகள் தாங்கிய வாகனமும் யாத்திரையில் வந்தது. மன்னீஸ்வரர் கோயிலில் ஏராளமான பக்தர்கள் வரவேற்பளித்தனர். வட்டமலை ஆண்டவர் கலைக்குழு சார்பில் வள்ளி கும்மியாட்டம் மற்றும் கரகாட்டம் நடந்தது. நேற்று குமாரபாளையம், சென்னப்ப செட்டி புதூர் வழியாக ரதம் கோவில்பாளையத்தை அடைந்தது. தன்னார்வலர்கள் கூறுகையில், தென் கைலாய பக்தி பேரவை சார்பில், சிவாங்க பாதயாத்திரை உடன் இந்த ரதத்தை கிராமங்கள் தோறும் கொண்டு செல்கிறோம். 40 பேர் சென்னையில் இருந்து வெள்ளிங்கிரி மலை வரை பாதயாத்திரையாக செல்கிறோம். பல கிராமங்களிலும் பக்தர்கள் சிறப்பான வரவேற்பு அளித்தனர். சிவராத்திரி குறித்து மக்களிடம் விழிப்புணர்வு ஏற்படுத்துவதே இதன் நோக்கம், என்றனர்.