நாகர்கோவில்;சிவராத்திரியை ஒட்டி கன்னியாகுமரி மாவட்டத்தில் 12 சிவாலயங்களை 100 கிலோ மீட்டர் சுற்றளவில் ஓடிச் சென்று வழிபடும் சிவாலய ஓட்டம் நேற்று நடைபெற்றது.

கன்னியாகுமரி மாவட்டம் கல்குளம், விளவங்கோடு தாலுகாவில் 12 பழங்கால சிவாலயங்கள் அமைந்துள்ளது. திருமலை, திக்குறிச்சி, திற்பரப்பு, திருந்திக்கரை, பொன்மனை, திருவிடைக்கோடு, கல்குளம், மேலாங்கோடு, திருவிடைக்கோடு,திருவிதாங்கோடு, திருப்பன்றியோடு, திருநட்டாளம் ஆகிய இடங்களில் இந்த கோயில்கள் அமைந்துள்ளது.

சிவராத்திரி நாளில் பக்தர்கள் ஓடிச் சென்றும், வாகனங்களில் சென்றும் பக்தர்கள் வழிபடுவது இதன் சிறப்பாகும். இதற்கு ஒரு வரலாற்று பின்னணி உள்ளது.புருஷா மிருகம் என்பது பாதி மனித உருவம், பாதி புலி உருவம் அமைந்த ஒரு பிறவி. ஆழ்ந்த சிவ பக்தர். சிவனை தவிர வேறு எந்த இறைவனையும் ஏற்க மாட்டார். விஷ்ணு நாமம் இவருக்கு பிடிக்காது. தானும் ஹரனும் ஒன்றே என்ற தத்துவத்தை உணர்த்துவதற்காக பகவான் கிருஷ்ணன் பஞ்சபாண்டவர்களில் ஒருவரான பீமனை அழைத்து, குருஷேத்திர யுத்தத்தில் வெற்றி பெற நடத்தப்படும் யாகத்திற்கு புருஷா மிருகத்தின் பால் தேவைப்படுவதால் அதை பெற்று வரும்படி பீமனை அனுப்பி வைத்தார்.

கூடவே 12 ருத்ராட்சங்களை வழங்கி கோபாலா கோவிந்தா என்று அழைத்தபடி புருஷா மிருகத்தை நெருங்குமாறு கூறிய கிருஷ்ண பகவான், என் பெயரை கேட்க விரும்பாத புருஷா மிருகம் உன் மீது பாயும், நீ உடனே ஒரு ருத்ராட்சத்தை அந்த இடத்தில் போட்டு விடு அது சிவலிங்கமாக மாறியதும் அதற்கு புருஷா மிருகம் பூஜைகள் செய்ய தொடங்கிவிடும். அங்கிருந்து நீ ஓடிவிடு. இப்படி ஒவ்வொரு இடமாக துரத்தி வரும்போது ருத்ராட்சத்தை போடும்படி கூறினார். 12 வது இடத்தில் ருத்ராட்சம் விழும்போது நானும் பரமேஸ்வரனும் இணைந்து காட்சி தருவோம் என்று விளக்கி பீமனை அனுப்பி வைக்கிறார்.

முதல் ருத்ராட்சம் முஞ்சிறை அருகே திருமலையில் விழுந்தது. கடைசி ருத்ராட்சம் திருநட்டாலத்தில் விழுந்தது. அங்கு ஹரியும் ஹரனும் இணைந்த சங்கரநாராயணராக மகாவிஷ்ணு காட்சி தந்து சிவனும் விஷ்ணு ஒன்று என்பதை புருஷா மிருகத்துக்கு உணர்த்தினார். அதைத்தொடர்ந்த யாகத்துக்கு பால் வழங்க புருஷாமிருகம் சம்மதித்தது. இந்த வரலாற்றை நினைவு கூரும் வகையில் தான் சிவாலய ஓட்டம் நடக்கிறது. ஓடுகின்ற பக்தர்கள் கையில் விசிறியும், இடுப்பில் திருநீற்றுப்பையும் கொண்டு கோபாலா கோவிந்தா என்று கோஷமிட்டபடி ஓடுகின்றனர். நேற்று முன்தினம் மதியம் தொடங்கிய இந்த ஓட்டம் நேற்று இரவு திருநட்டாலத்தில் நிறைவு பெற்றது. வாகனங்களில் செல்பவர்கள் நேற்று அதிகாலை முஞ்சிறையில் இருந்து தங்கள் பயணத்தை தொடங்குவார்கள். இதையொட்டி இந்தக் கோயில் அமைந்துள்ள பாதைகளில் பலத்த போலீஸ் பாதுகாப்பும் , போக்குவரத்து ஒழுங்கு படுத்துவதற்கான நடவடிக்கைகளும் மேற்கொள்ளப்பட்டிருந்தது.