காஞ்சிபுரம்: காஞ்சிபுரம் வரதராஜப் பெருமாள் கோவில் வனபோஜன உற்சவம், வரும் 9ம் தேதி நடைபெற உள்ளது. உற்சவத்தையொட்டி, 9ம் தேதி காலை 4:30 மணிக்கு, பெருமாள் கோவிலிலிருந்து, மேளதாளங்கள் ஒலிக்க, அதிர்வேட்டுகள் முழங்க, பக்தர்கள் புடைசூழ புறப்படுவார். மாட வீதி, ஆணை கட்டித் தெரு, வேகவதி தெரு, சதாவரம், உதயமாங்குளம், சின்னய்யங்குளம், ஓரிக்கை, மணிமண்டபம், களக்காட்டூர் சென்று பாலாற்றை வந்தடைவார். வழிநெடுகிலும் மண்டகப்படி நடைபெறும். பகல் 2:00 மணியிலிருந்து, 5:00 மணி வரை, பாலாற்றில் திருமஞ்சனம் நடைபெறும். தீபாராதனைக்கு பிறகு, பெருமாள் பாலாற்றிலிருந்து புற்பட்டு, அண்ணா நெசவாளர் குடியிருப்பு, புண்ணிய கோட்டீஸ்வரர் கோவில் தெரு, ஸ்ரீரங்கராஜவீதி, தேசிகர் சன்னிதி ஆகியவற்றில் மண்டகப்படி கண்டருளி, இரவு 8:30 மணிக்கு, கோவிலை சென்றடைவார். இதற்கான ஏற்பாடுகளை, கோவில் உதவி ஆணையர் தியாகராஜன் மற்றும் நிர்வாகிகள் செய்து உள்ளனர்.