மோகனூர்: மோகனூர் யூனியன், ஆர்.சி.பேட்டப்பாளையத்தில், புனித செசீலி ஆலயம் உள்ளது. இங்கு, ஆண்டு தோறும் புனித செபஸ்தியார் தேர்த்திருவிழா, வெகுவிமரிசையாக கொண்டாடப்படுவது வழக்கம். இந்த ஆண்டு விழா, கடந்த, 5ம் தேதி, கொடியேற்றத்துடன் துவங்கியது. அதை தொடர்ந்து, சிறப்பு தயாரிப்பு விழா திருப்பலி மற்றும் குணமளிக்கும் வழிபாடு, வேண்டுதல் தேர் திருவிழா திருப்பலியும் நடந்தது. நேற்று முன்தினம் காலை, 9 மணிக்கு, ராசிபுரம் பங்குதந்தை தியோடர் செல்வராஜ் தலைமையில், திருவிழா திருப்பலியும், மாலை, 6.30 மணிக்கு, நாமக்கல் கொசவம்பட்டி பங்குதந்தை ஜான்கென்னடி தலைமையில், திருப்பலியும் நடந்தது. அன்று மாலை, 6.45 மணிக்கு, புனித செபஸ்தியார் அழகுத்தேர் பவனி நடந்தது. மின் அலங்காரத்தேரில் எழுந்தருளிய புனிதர், கீழப்பேட்டப்பாளையம், புதுத்தெரு, ப.வேலூர் சாலை, சர்க்கரை ஆலை, வண்டிகேட் வழியாக பவனி வந்து பக்தர்களுக்கு ஆசீர் வழங்கினார். வழிநெடுகிலும், ஏராளமான பக்தர்கள் மெழுகுவர்த்தி ஏற்றியும், மாலை அணிவித்தும் புனிதரை வணங்கினர். நேற்று காலை, 8 மணிக்கு, அனந்த ரெட்டியார் பொங்கல், 11 மணிக்கு நன்றித்திருப்பலி மற்றும் கொடியிறக்கமும் நடந்தது.