ராசிபுரம்: பத்ரகாளியம்மன் கோவில் திருவிழாவில், சுற்று வட்டாரத்தை சேர்ந்த ஏராளமான பக்தர்கள் குண்டம் இறங்கி நேர்த்திக்கடன் செலுத்தினர்.
ராசிபுரம் அடுத்த மேட்டுக்காட்டில், பத்ரகாளியம்மன் கோவில் உள்ளது. இக்கோவிலில், ஆண்டு தோறும் பொங்கல் விழா, வெகுவிமரிசையாக கொண்டாடப்படுகிறது. இந்த ஆண்டு விழா, நேற்று முன்தினம், பால்குடம் ஊர்வலத்துடன் துவங்கியது. முக்கிய வீதிகள் வழியாக ஊர்வலமாக சென்று கோவிலை அடைந்தது. தொடர்ந்து, ஸ்வாமிக்கு பாலாபிஷேகம் செய்யப்பட்டது. நேற்று அதிகாலை, 5 மணிக்கு பொங்கல் வைக்கும் நிகழ்ச்சி நடந்தது. காலை, 9 மணிக்கு அலகு குத்தியும், கரகம் எடுத்தும் பக்தர்கள் அம்மனுக்கு நேர்த்திக்கடன் செலுத்தினர். மாலை, 5 மணிக்கு குண்டம் இறங்கும் விழா நடந்தது. சுற்று வட்டாரத்தை சேர்ந்த ஆயிரக்கணக்கான பக்தர்கள், தீக்குண்டம் இறங்கி, தங்களது வேண்டுதலை நிறைவேற்றினர். மாலை, 6 மணிக்கு, எருமை கிடா வெட்டும் நிகழ்ச்சி நடந்தது. அம்மன் சன்னதி எதிரே, "மெகா சைஸ் குழி வெட்டப்பட்டு, மூன்றடி அரிவளால் கோவிலுக்கு நேர்ந்து விடப்பட்ட எருமை கிடாவை வெட்டி, குழியில் போட்டு மூடப்பட்டது. அதை தொடர்ந்து, வாண வேடிக்கை நடந்தது. இன்று (ஃபிப்., 7) இரவு, 9 மணிக்கு, சத்தாபரணத்தையொட்டி அலங்கரிக்கப்பட்ட புஷ்ப பல்லக்கில், ஸ்வாமி திருவீதி உலா வந்து, பக்தர்களுக்கு அருள்பாலிக்கிறார். நாளை (ஃபிப்., 8) காலை, 8 மணிக்கு, மஞ்சள் நீராட்டு விழா, அம்மன் குடிபுகுதல் நிகழ்ச்சி நடக்கிறது. ஏற்பாடுகளை, கோவில் நிர்வாகத்தினர், ஊர் பொதுமக்கள் செய்துள்ளனர்.