திண்டுக்கல் கோட்டை மாரியம்மன் கோயில் மாசி திருவிழா இன்று(பிப். 7) காலை 10 மணிக்கு பாலாபிஷேகத்துடன் துவங்குகிறது. பிரசித்தி பெற்ற திண்டுக்கல் கோட்டை மாரியம்மன் கோயில் மாசி திருவிழா இன்று காலை 10 மணிக்கு பாலாபிஷேகத்துடன் துவங்குகிறது. மாலை 6 மணிக்கு சிறப்பு பூஜையும், பூ அலங்காரமும் நடைபெறும். திருவிழாவின் இரண்டாவது நாளில்(பிப். 8) காலை 9 மணிக்கு பூச்சொரியல் விழா, பூத்தேர் கோயிலில் இருந்து புறப்பட்டு, மேற்குரத வீதி, கலைக்கோட்டு விநாயகர் கோயில், பென்சனர் தெரு, கோபால சமுத்திரம் தெரு, கிழக்குரத வீதி, தெற்கு ரத வீதிகளை சுற்றி சந்நிதி வந்து சேரும். அன்று முழுவதும் அம்மனுக்கு புஷ்பாபிஷேகம் நடைபெறும். பிப். 12 செவ்வாய் பகல் 12 மணிக்கு கொடியேற்றப்படும். பிப். 15 வெள்ளியன்று காலை 10 மணிக்கு கரகத்துடன் கோயிலில் இருந்து அம்மன் புறப்பட்டு மேற்குரத வீதி, வடக்கு ரத வீதி, கோயில் தெரு, மெயின் ரோடு வழியாக பெரிய கடை வீதி, தெற்கு ரத வீதி வழியாக சன்னதி வந்தடையும்.  பிப். 26 செவ்வாய் அன்று கோயிலில் அம்மன் லட்சுமி அலங்காரத்துடன் தெப்ப உற்சவம் நடைபெறும். ஏற்பாடுகளை நிர்வாக பரம்பரை அறங்காவலர் சண்முக முத்தரசப்பன், பரம்பரை அறங்காவலர்கள் பாலசுந்தரம், சுதந்திரராஜன், கோபாலன், மகாலட்சுமி, முத்துராஜ், சுபாஷினி, பாலகுரு, ராமமூர்த்தி, கணேசன் செய்துள்ளனர். தங்க ரத புறப்பாடு; கோயில் திருவிழாவை முன்னிட்டு, இன்று முதல் பிப். 26 வரை தங்கரத புறப்பாடு இல்லை என சண்முக முத்தரசப்பன் தெரிவித்தார்.