மதுரை: மதுரை தல்லாகுளம் லட்சுமி சுந்தரம் ஹாலில் சத்குரு சங்கீத சமாஜம், அகில பாரத ஸாது சங்கம் சார்பில் வால்மீகி ராமாயண சொற்பொழிவு அக். 9 வரை நடக்கிறது.

நேற்று ‘பரத பக்தி’ என்ற தலைப்பில் ஆன்மிக சொற்பொழிவாளர் ரெங்கன் ஜி சிஷ்யர் சந்தான ராமன் பேசியதாவது: அயோத்தி திரும்பியதும் தந்தையின் மறைவு, அண்ணன் வனம் சென்றதை அறிந்து அதிர்ச்சியடைந்த பரதன், தன் தாயிடம் கோபம் கொண்டார். ‘ராமர் பட்டாபிஷேகத்தை பார்க்க நினைத்தேனே. சுயநலம், சொத்துக்காக அவரை காட்டுக்கு அனுப்பி விட்டாயே’ என்று கொதித்த பரதனிடம் தந்தையின் கோபம் அப்படியே வெளிப்பட்டது.

‘ராமரை காட்டு அனுப்பி சொத்தை அனுபவிக்க நினைப்பவன் நான் அல்ல. என்னையே ராமர் தான் ஆள வேண்டும். அவரை இன்றே அழைத்து பட்டாபிஷேகம் செய்வேன். தந்தையின் ஆசையை நிறைவேற்றுவேன். அயோத்தி சாம்ராஜ்யம் ராமருக்கு மட்டுமே’ என்றார் பரதன்.

கையில் கிடைத்த ராஜ்ஜியத்தை துச்சமென நினைத்த பரதனின் புகழ், உலகில் ராமரின் புகழ் இருக்கும் வரை நிலைக்கும். சோகத்தில் மூழ்கினால் தைரியம் அழிந்துவிடும். ‘சோகத்திற்கு ஈடான எதிரி கிடையாது’ என்பதை ராமாயணம் உணர்த்துகிறது என்றார்.

தொடர்ந்து ‘பாதுகா பட்டாபிஷேகம்’ தலைப்பில் ரெங்கன் ஜி சிஷ்யை காயத்ரி பேசினார். இன்று மாலை 4:00 மணிக்கு சொற்பொழிவு தொடர்கிறது. ஏற்பாடுகளை அகில பாரத ஸாது சங்கத்தினர் செய்திருந்தனர்.