காஞ்சிபுரம்: காஞ்சிபுரம் கைலாசநாதர் கோவில் கோபுரம் மற்றும் சுற்றுச்சுவரில் உள்ள மணல் கற்சிற்பங்களில் படிந்துள்ள பாசி, அழுக்கு ஆகியவற்றை அகற்றி, அவை புதுப்பொலிவுடன் காட்சியளிக்கும் வகையில், பழமை மாறாமல் ரசாயன கலவை பூசும் பணி நடந்து வருகிறது.

காஞ்சிபுரம் கைலாசநாதர் கோவில், 1,300 ஆண்டுகளுக்கு முன், பல்லவர் காலத்தில் ‛சாண்ட் ஸ்டோன்’ எனப்படும் மணல் கற்களால் பல்லவர்கள் ஆட்சிக்காலத்தில் கட்டப்பட்டது. இக்கோவிலில், மணல் கற்களால் செய்யப்பட்ட, அழகிய கலைநியமிக்க, 1,000க்கும் மேற்பட்ட சிற்பங்கள் உள்ளன. வெளியூர், வெளிநாடுகளில் இருந்து ஏராளமான சுற்றுலா பயணிகள் வந்து செல்கின்றனர்.இக்கோவில் கோபுரம் சுற்றுச்சுவரில் உள்ள மணல் கற்சிற்பங்கள், மழையால் பாசி படிந்தும், துாசுகளால் மாசடைந்தும் இருந்தது. சென்னை, துணை வேதியியல் தொல்லியல் துறை கண்காணிப்பாளர் அலுவலகம் சார்பில், பழமை மாறாமல் புதுப்பொலிவு பெறும் வகையில் சீரமைக்கும் பணி நடந்து வருகிறது. 

இதுகுறித்து தொல்லியல்துறை அதிகாரி ஒருவர் கூறியதாவது: காஞ்சிபுரம் கைலாசநாதர் கோவில் கோபுரம் மற்றும் மணல் கற்சிற்பங்களின் மீது படிந்துள்ள பாசி மற்றும் கறைகளை சுத்தப்படுத்தி, கோவில் புதுப்பொலிவு பெறும் வகையில், கற்சிற்பங்கள் மீது தண்ணீர் ஒட்டாதவாறு, ரசாயண கலவை பூசும்பணி நடந்து வருகிறது.