திருவண்ணாமலையில் கார்த்திகை தீபம் காண பக்தர்களுக்கு இலவச டிக்கெட் ஆன்லைனில் முன்பதிவு
பதிவு செய்த நாள்
18
நவ 2026 01:11
திருவண்ணாமலை கார்த்திகை தீபம் தரிசனத்திற்கு, கடந்த ஆண்டைப் போல் பக்தர்களிடம் கட்டணம் வசூலிக்காமல், இந்த ஆண்டு இலவசமாக டிக்கெட் வழங்கப்படும் என கோயில் நிர்வாகம் அறிவித்துள்ளது. திருவண்ணாமலை அருணாச்சலேஸ்வரர் கோவிலில் கடந்த ஆண்டு நடந்த திருக்கார்த்திகை தீப திருவிழாவின் போது, பரணி தீபம் மற்றும் மகா தீபம் தரிசனத்திற்காக, தலா 500 மற்றும் 600 ரூபாய் மதிப்புள்ள கட்டண நுழைவுச்சீட்டுகள் 1,600 எண்ணிக்கையில் இணையதளம் வாயிலாக முன்பதிவு செய்யப்பட்டன. இந்த ஆண்டு பக்தர்களிடம் கட்டணம் வசூலிக்காமல், தரிசன டிக்கெட்டை இலவசமாக முன்பதிவு செய்ய நடவடிக்கை எடுக்கப்பட்டுள்ளது. மேலும், இம்முறை 3,000 டிக்கெட்டுகள் ஆன்லைனில் வழங்கப்பட உள்ளது. annamalaiyar.hrce.tn.gov.in என்ற இணையதளத்தில் பக்தர்கள் முன்பதிவு செய்யலாம். வரும் 24ஆம் தேதி நடக்கவுள்ள பரணி தீபத்திற்கு, திருவண்ணாமலை மாவட்டச் சேர்ந்த உள்ளூர் பக்தர்களுக்கு 500 மற்றும் பிற மாவட்ட பக்தர்களுக்கு 500 நுழைவு சீட்டுகள் வழங்கப்படும். மகா தீபத்திற்கு உள்ளூர் பக்தர்களுக்கு 1,000 மற்றும் பிற மாவட்டங்களை சேர்ந்த பக்தர்களுக்கு 1,000 நுழைவுச் சீட்டுகள் வழங்கப்படும். இவற்றை பெற விரும்பும் பக்தர்கள், தங்களின் ஆதார் எண், மொபைல் எண் பயன்படுத்தி வரும் 18ஆம் தேதி காலை 11 மணி முதல் 20 ஆம் தேதி மாலை 3 மணி வரை இலவசமாக பதிவு செய்து கொள்ளலாம். 20ம் தேதி மாலை 4 மணிக்கு, தானியங்கி குலுக்கல் முறையில் பக்தர்கள் தேர்வு செய்யப்படுவர். குலுக்கலில் தரிசன வாய்ப்பை பெறும் பக்தர்களுக்கு, அது குறித்த விபரம் எஸ்எம்ஸ் மூலம் அனுப்பப்படும். அந்த பக்தர்கள் இ - டிக்கெட்களை பதிவிறக்கம் செய்து கொள்ளலாம். பரணி தீபத்திற்கு பதிவு செய்வோர், மகா தீபத்திற்கு பதிவு செய்ய இயலாது. மகா தீபத்திற்கு பதிவு செய்வோர், பரணி தீபத்திற்கு பதிவு செய்ய இயலாது என, கோயில் நிர்வாகம் வெளியிட்ட அறிக்கையில் கூறப்பட்டுள்ளது.
|