நாகப்பட்டினம்: நாகப்பட்டினம் அடுத்த, நாகூர் தர்கா கந்தூரி விழாவை ஒட்டி, சந்தனக்கூடு ஊர்வலம் மற்றும் சந்தனம் பூசும் வைபவம் நடந்தது. நாகப்பட்டினம் அடுத்த, நாகூர் ஷாஹூல் ஹமீத் பாதுஷா நாயகம் தர்காவின், 456ம் ஆண்டு கந்தூரி விழா, கடந்த, 11ம் தேதி இரவு, கொடியேற்றத்துடன் துவங்கியது. முக்கிய நிகழ்ச்சியாக, சந்தனம் பூசும் வைபவத்தை முன்னிட்டு, நேற்று முன்தினம் இரவு, சந்தனக்கூடு ஊர்வலம், நாகை, அபிராமியம்மன் வாசலில் இருந்து புறப்பட்டது. சாம்பிராணி சட்டி, நகரா மேடை உட்பட, 25க்கும் மேற்பட்ட மின் அலங்கார ரதங்கள், சந்தனக்கூடுடன் வந்தன. நேற்று அதிகாலை, நாகூரை வந்தடைந்த சந்தனக்கூடு ஊர்வலம், முக்கிய வீதிகளில் வலம் வந்து, காலை, 4:30 மணிக்கு, தர்கா அலங்கார வாசலை வந்தடைந்தது. தர்கா மானேஜிங் டிரஸ்டி ஷேக் ஹசன் சாகிப் தலைமையில் தர்கா நிர்வாகிகள் வரவேற்றனர். சந்தனக்கூடு ரதத்தில் இருந்து, சந்தனம் நிரப்பப்பட்ட குடங்கள், தர்காவிற்குள் கொண்டு செல்லப்பட்டன. பின், தர்கா பரம்பரை டிரஸ்டி கலிபா மஸ்தான் சாகிப், துவா ஓதிய பின், சந்தனம் பூசும் நிகழ்ச்சி நடந்தது. இதில், பல்லாயிரக்கணக்கானோர் கலந்து கொண்டனர்.