தஞ்சாவூர்: திருவையாறில், சத்குரு தியாகராஜ சுவாமிகள், 168வது ஆராதனை மஹோத்ஸவம், வரும் ஜனவரி, 6ம் தேதி துவங்குகிறது,” என, தியாக பிரம்ம மஹோத்ஸவ சபை தலைவர் ஜி.ஆர்.மூப்பனார் தெரிவித்தார்.அவர் கூறியதாவது:தஞ்சாவூர் மாவட்டம், திருவையாறில், சத்குரு தியாகராஜ சுவாமிகளின், 168வது ஆராதனை மஹோத்ஸவ விழா, ஜனவரி, 6ம் தேதி மாலை, 5:00 மணிக்கு துவங்குகிறது. இரவு, 7:00 மணிக்கு இசை நிகழ்ச்சி நடக்கிறது.ஜனவரி, 7 மற்றும் 8ம் தேதிகளில், காலை, 9:00 மணி முதல், இரவு, 11:00 மணி வரை இசை நிகழ்ச்சிகள் நடக்கும்.ஜனவரி, 9ம் தேதி, காலை, 6:00 மணிக்கு, தியாக பிரம்ம மஹோத்ஸவ சபை சார்பில், சஹஸ்ர நாம அர்ச்சனையும், காலை, 9:00 மணி முதல், இரவு, 11:00 மணி வரை, இசை நிகழ்ச்சிகளும், இரவு, 11:00 மணிக்கு மேல் திவ்யநாமமும் நடத்தப்படுகின்றன.10ம் தேதி காலை, 6:00 மணிக்கு, உஞ்சவிருத்தி பஜனையும், காலை, 8:30 மணிக்கு நாதஸ்வர இசையும், 9:00 மணிக்கு ஆராதனை மற்றும் பஞ்சரத்ன கீர்த்தனைகளுடன் மகாபிஷேகம் ஆகிய நிகழ்ச்சிகளும் நடக்கின்றன. காலை, 10:00 மணி முதல், இசை நிகழ்ச்சிகளும், இரவு, 7:30 மணிக்கு மல்லாரியுடன், சத்குரு தியாகராஜர் உருவச்சிலை ஊர்வலம் மற்றும் ஆஞ்சநேய உற்சவ மங்களத்துடன் நிகழ்ச்சி நிறைவடைகிறது. இசை நிகழ்ச்சிகளில், நாட்டின் பல்வேறு பகுதிகளில் இருந்து, நூற்றுக்கணக்கான இசைக் கலைஞர்கள் பங்கேற்கின்றனர். இவ்வாறு, அவர் கூறினார். பந்தல் கால் நடவு: திருவையாறு, தியாகராஜ சுவாமிகள் ஆராதனை விழாவுக்காக, நேற்று பந்தல் கால் நடப்பட்டது. விழாவின் போது, இசைக் கலைஞர்கள், பக்தர்கள் மற்றும் பார்வையாளர்கள் அமர வசதியாக, தனித்தனியே மேடை மற்றும் பந்தல் அமைக்கப்பட உள்ளன. பந்தல் அமைப்பதற்கான கால்கோள் விழா, நேற்று நடந்தது.