ஸோகம் என்ற வடமொழி சொல்லையே சோகம் என தமிழில் சொல்கிறோம். ஸோகம் என்றால் அவனே நான் எனப் பொருள். நம்மிடம் பிரியமாக இருந்த ஒருவரை இழக்க நேரும் போது, சோகம் உண்டாகிறது. கணவனை இழந்த மனைவி, மனைவியை இழந்த கணவன், குழந்தையை இழந்த பெற்றோர், பெற்றவர்களை இழந்த குழந்தைகளை சோகம் அதிகமாக கவ்வுகிறது. சோகத்தை மற்றவர்களுடன் பகிர்ந்து கொள்ளும் போது, அவர்களும் சோக வடிவினர் ஆகிறார்கள். உன்னை வந்தடைந்த சோகம் என்னையும் சேரட்டும் என்ற பொருளிலேயே அவனே நான் அல்லது ஸோகம் என்ற வார்த்தை உருவானது. அப்பூதியடிகளின் மகன் பாம்பு கடித்து இறந்ததும் அவரைச் சோகம் கவ்வியது. திருநாவுக்கரசருக்கு இவ்விஷயம் தெரிந்ததும் அவரும் சோகத்தில் ஆழ்ந்தார். இந்த சோகத்தில் இருந்து அப்பூதி அடிகளை மீட்க, சிவபெருமானை வேண்டி, நாகத்தை வரவழைத்து, நஞ்சை திருப்பி எடுக்கச் சொல்லி பதிகம் பாடினார். குழந்தையும் பிழைத்தான். சோகம் பகிரப்படும் போது, சம்பந்தப்பட்டவனுக்கு ஆறுதல் கிடைக்கும் என்பதை உணர்த்துவதே இந்த வரலாறு உணர்த்தும் உண்மையாகும்