தூத்துக்குடி : திருச்செந்தூர் முருகன் கோயில் வளாகத்தில் பக்தர்களின் வசதிக்காக ஒருங்கிணைந்த தகவல் மையம் திறக்கப்பட்டுள்ளது. இங்கு சண்முகவிலாச மண்டபத்தில் நேற்று இதனை கோயில் இணை ஆணையர் பாஸ்கரன் திறந்துவைத்தார். கோயில் நடை திறப்பு, பூஜை நேரம், வழிபாட்டு முறைகள், தரிசன கட்டணங்கள், தங்கும் விடுதி விவரங்கள் போன்றவையும், அருகிலுள்ள முக்கிய கோயில்களின் விவரங்களையும் இதில் பக்தர்கள் கேட்டு தெரிந்து கொள்ளலாம். மேலும், வெளியூர்களுக்கு செல்லும் பஸ், ரயில் நேரம், கட்டண விவரத்தையும் அறிந்துகொள்ளலாம். இணை ஆணையர் பாஸ்கரன் கூறும்போது, பக்தர்களுக்காக, இங்கு 2.85 கோடி ரூபாய் செலவில் சாமான்கள் பாதுகாப்பு அறையுடன் கூடிய கந்த சஷ்டி விரத மண்டபம் கட்டப்படவுள்ளது. மேலும், நாழிக்கிணறு பஸ்ஸ்டாண்ட் அருகில் 92 லட்சம் ரூபாய் செலவில் இரண்டு தளங்களுடன் கூடிய பக்தர்களுக்கான தங்கும் அறை கட்டப்படவுள்ளது. அதே பஸ்ஸ்டாண்ட் பகுதியில் 81 லட்சம் ரூபாய் செலவில் 20 அடி அகலத்தில் காங்கிரீட் மேற்கூரையுடன் கூடிய நடைபாதை அமைக்கப்படவுள்ளது. கோயிலுக்கு சொந்தமான 1,500 ஏக்கர் நஞ்சை மற்றும் புஞ்சை நிலங்கள் பாதுகாக்கப்படவுள்ளன. கோயில் யானைக்கு தரமான உணவு வழங்க நடவடிக்கை எடுக்கப்படவுள்ளது என்றார்.