காரைக்குடி : முத்துமாரிம்மன் கோயிலில் வடை, பாயாசத்துடன் பக்தர்களுக்கு அன்னதானம் வழங்கப்பட்டது. முதல்வராக ஜெ.,பொறுப்பேற்றதை தொடர்ந்து தமிழகத்தில் பல்வேறு நலத்திட்டங்கள் செயல்படுத்தப்படுகின்றன. தற்போது கோயில்களில் செயல்படுத்தப்பட்டு வரும் அன்னதான திட்டத்தை சிறப்பான முறையில், செயல்படுத்த உத்தரவிடப்பட்டுள்ளது. நிதி வசதி அதிகம் உள்ள கோயில்களில் அன்னதான திட்டத்தில் கூடுதலாக வடை, பாயாசம், பொரியல் சேர்த்து பரிமாற உத்தரவிடப்பட்டுள்ளது. காரைக்குடி முத்துமாரியம்மன் கோயிலில் இத்திட்டத்தை எம்.எல்.ஏ., பழனிச்சாமி துவக்கி வைத்தார்.

கோயில் நிர்வாக அதிகாரி முத்துராமன் கூறுகையில், கோயிலில் உச்சிகால பூஜை முடிந்தவுடன், தினமும் 100 பேருக்கு அன்னதானம் வழங்கப்படுகிறது. தற்போது, நிதி வசதியுள்ள கோயில்களில் வெள்ளி மற்றும் விழா காலங்களில் அன்னதானத்துடன் கூடுதலாக ஒரு பொரியல், வடை, பாயாசத்துடன் பரிமாற வேண்டும் என, அரசு உத்தரவிட்டுள்ளது. அதன்படி இத்திட்டம் துவக்கப்பட்டு, தினசரி 150 பக்தர்கள் பயன்பெறும் வகையில் அன்னதானம் வழங்கப்படும்.கும்பாபிஷேக திருப்பணிகள் நடப்பதால், டேபிள், சேர் அமைத்து அன்னதானம் வழங்கமுடியவில்லை. இனிவரும் காலங்களில் இந்த முறை நடைமுறைப்படுத்தப்படும் என்றார்.