வத்திராயிருப்பு : வத்திராயிருப்பு சேதுநாராயணப்பெருமாள் கோயிலில் நடந்த திருக்கல்யாணத்தில் ஏராளமான பக்தர்கள் தரிசனம் செய்தனர். வத்திராயிருப்பு சேதுநாராயணப்பெருமாள் கோயிலில் நடந்த விழா 5ம் நாளில் பெருமாள் ஸ்ரீதேவி, பூதேவி தாயார் திருமண வைபவம் கோலாகலமாக நடந்தது. அதிகாலையில் தேவியர்களுக்கும், சுவாமிக்கும் சிறப்பு அபிஷேகம், ஆராதனை , திருமஞ்சனம் நடந்தது. பச்சை பட்டுடன் ஸ்ரீதேவி, காவிப்பட்டில் பூதேவி, சிவப்பு வண்ண பட்டில் பெருமாள் ஆகியோர் கோயில் முன் அமைக்கப்பட்ட ஆண்டாள் அரங்கில் எழுந்தருளினர். ஹோம பூஜைகள் நடந்தபின், மங்கள வாத்தியங்கள் முழங்க தேவியர் இருவருக்கும் சுவாமி தாலி அணிவித்தார். பின் திருமண சடங்குகளும், நலங்கு வைபவமும் நடந்தது. சென்னை டி.வி.எஸ். நிறுவன அதிபர்கள் சரத்விஜயராகவன், பத்ரிவிஜயராகவன், தொழிலதிபர் பார்த்தசாரதி, கோயில் சேவா சமிதி டிரஸ்ட் செயலாளர் நாராயணன், தலைவர் ராஜகோபாலன், பொருளாளர் அழகர், நிர்வாகிகள் ஏராளமான பக்தர்கள் வழிபட்டனர். தொடர்ந்து குதிரை வாகன எழுந்தருளலும் வீதியுலா நடந்தது.