வடலுார்: வடலுாரில் வள்ளலார் நிறுவிய சத்திய ஞான சபையில் 146வது தைப்பூச ஜோதி தரிசன விழா வரும் 9ம் தேதி நடக்கிறது.  விழாவை முன்னிட்டு இன்று (1ம் தேதி) முதல் 3ம் தேதி வரை தரும சாலையில் மகாமந்திரம் ஓதுதல். 4ம் தேதி முதல் 7ம் தேதி வரை ஞான சபையில் திருஅருட்பா முற்றோதல் நடைபெறும். 8ம் தேதி காலை 5:00 மணிக்கு அருட்பெருஞ்ஜோதி அகவற் பாராயணம், காலை 7:30 மணிக்கு தரும சாலை, வள்ளலார் பிறந்த மருதுார், வள்ளலார் தண்ணீரில் விளக்கேற்றிய கருங்குழி ஆகிய இடங்களில் சன்மார்க்கக் கொடியேற்றுதல் நடைபெறும். காலை 10:00 மணிக்கு பார்வதிபுரம் கிராம வாசிகள் சார்பில் ஞானசபையில் சன்மார்க்கக் கொடியேற்றம், இரவு 7:00 மணிக்கு திருஅருட்பா கருத்தரங்கம் நடைபெறும்.  9ம் தேதி முக்கிய நிகழ்வான தைப்பூச ஜோதி தரிசனம் நடைபெற உள்ளது.

அன்று காலை 6:00 மணி, 10:00, மதியம் 1:00, இரவு 7:00; 10:00 மணி மற்றும் 10ம் தேதி காலை 5:30 மணிக்கு என ஆறு காலங்கள் ஏழு திரைகள் நீக்கி ஜோதி தரிசனம் காண்பிக்கப்படும்.  காலை 11:00 மணிக்கு தரும சாலை பிரசங்க மேடையில் சன்மார்க்கக் கருத்தரங்கம் நடைபெறும். அதைத்தொடர்ந்து பிப்வரி 11ம் தேதி வள்ளலார் சித்தி பெற்ற சித்தி வளாகத்தில் திருஅறை தரிசனம் நடைபெறும். அன்று காலை 10:00 மணிக்கு வள்ளலார் பயன்படுத்திய பொருட்கள் அடங்கிய பேழை ஆலங்கரிக்கப்பட்டு வள்ளலார் நடந்து சென்ற பாதை வழியாக மேட்டுக்குப்பம் சித்தி வளாகம் எடுத்துச் சென்று அங்கு வள்ளலார் சித்தி பெற்ற அறை முன் வைத்து மதியம் 12:00 மணிக்கு திருஅறை திறக்கப்பட்டு மாலை 6:00 மணி வரை திருஅறை தரிசனம் நடைபெறும். விழா ஏற்பாடுகளை பார்வதிபுரம் கிராம வாசிகள், இந்து அறநிலையத்துறை அதிகாரி செய்து வருகின்றனர்.