மதுரை: இன்று கள்ளழகர் புறப்படுகிறார் பக்தர்களை நேரில் சந்தித்து ஆசி வழங்க இன்று மாலை அழகர்கோவிலில் இருந்து  மதுரைக்கு புறப்படும் கள்ளழகர் மே 10ம் தேதி மதுரை வைகை ஆற்றில் இறங்குகிறார்.அழகர்கோவில் சித்திரை திருவிழா மே 6ம் தேதி துவங்கியது.
முதல் 2 நாட்களும் தோளுக்கினியான் அலங்காரத்தில் பல்லக்கில் புறப்பட்ட சுந்தரராஜ பெருமாள் கோயிலை வலம் வந்து பக்தர்களுக்கு அருள் பாலித்தார்.

சித்திரை திருவிழாவின் முக்கியமான கள்ளழகர் வைகை ஆற்றில் இறங்கும் நிகழ்ச்சி மே 10 ல் நடக்கிறது. இதற்காக இன்று மாலை 5:20 மணிக்கு கள்ளழகர் திருக்கோலத்தில் தங்கப் பல்லக்கில் புறப்படுகிறார்.

கோயில் முன் உள்ள கொண்டப்ப நாயக்கர் மண்டபத்தில் வையாழியானவுடன் கொம்பு சாற்றும் நிகழ்ச்சி நடக்கிறது. பின் ராஜ கோபுரத்தில் காவல் தெய்வமாக வீற்றிருக்கும் 18ம் படி
கருப்பண்ண சுவாமியிடம் அனுமதி பெற்று இரவு 7:00 மணிக்கு மேள, தாளம் முழங்க புறப்படுகிறார்.

அழகர்கோவிலில் இருந்து மதுரை வரும் வழியில் பக்தர்கள் அமைத்திருக்கும் மண்டகபடிகளில் எழுந்தருளி, நாளை காலை 6:00 மணிக்கு மூன்றுமாவடி வரும் கள்ளழகருக்கு பக்தர்கள் எதிர் கொண்டழைக்கும் எதிர்சேவை நிகழ்ச்சி நடக்கிறது. தொடர்ந்து
புதூரிலும், மாலையில் அவுட்போஸ்டிலும் எதிர்சேவை நடக்கிறது.

நள்ளிரவு தல்லாகுளம் பெருமாள் கோயிலை வந்தடையும் கள்ளழகருக்கு திருமஞ்சணம் நடக்கிறது.அதிகாலையில் ஸ்ரீவில்லிபுத்தூர் ஆண்டாள் சூடிக் கொடுத்த மாலையை ஏற்றுக் கொண்டு தங்க குதிரை வாகனத்தில் புறப்படும் கள்ளழகர் காலை 6:15 மணிக்கு மேல் 7:00 மணிக்குள் ஆற்றில் இறங்குகிறார். பக்தர்களுக்கு தேவையான அனைத்து ஏற்பாடுகளையும் மாவட்ட நிர்வாகத்துடன் இணைந்து கள்ளழகர் கோயில் நிர்வாகத்தினர் செய்துள்ளனர்.