காஞ்சிபுரம்:  காஞ்சிபுரம் வரதராஜப்பெருமாள் கோவிலுக்கு வரும், சுற்றுலா பயணியர், தங்கள் உடமைகளை பாதுகாக்கும் அறை வசதி செய்து தரவேண்டும் என, எதிர்பார்க்கின்றனர்.காஞ்சிபுரம் வரதராஜ பெருமாள் கோவிலுக்கு, தினமும் உள்ச்ளூர் மட்டுமின்றி இந்தியாவில் பல்வேறு மாநிலங்களில் இருந்தும், ஏராளமான சுற்றுலா பயணியர் தினமும் வந்து, செல்கின்றனர். அவ்வாறு வருபவர்கள், தங்களது உடமைகளை பாதுகாக்கும் அறை இல்லாததால், கூட்ட நெரிசலிலும், வரிசையில் நிற்கும் போதும் உடமைகளை சுமந்து நிற்க வேண்டிய நிலை உள்ளது. சுற்றுலாவிற்கு குழுவாக வரும் போது, குழுவில் உள்ள ஒருவரை, உடமைகளின் பாதுகாப்புக்காக நிறுத்திவிட்டு, சுவாமி தரிசனம் செய்ய செல்கின்றனர். ஒரே நபரால், ஏராளமான உடமைகளை பாதுகாப்பதில் பல்வேறு சிரமங்கள் உள்ளன. மேலும், அந்த பக்தர் கோவிலில் சுவாமி தரிசனம் செய்ய முடியாத பரிதாப நிலையும் உள்ளது. எனவே, வரதராஜப்பெருமாள் கோவிலில், பக்தர்கள் உடமைகளை பாதுகாக்கும் அறை துவக்க நடவடிக்கை எடுக்க வேண்டும் என்பதே சுற்றுலா பயணியரின் விருப்பமாக உள்ளது. ஒரு நாள் சுற்றுலாவாக, காஞ்சிபுரத்தில் உள்ள கோவில்களைச் சுற்றி பார்க்க வந்தோம். காஞ்சிபுரத்தில், காமாட்சியம்மன் கோவிலில் மட்டுமே, பக்தர்கள் உடமைகளை பாதுகாக்கும் அறை உள்ளது. வேறு எந்த கோவில்களிலும் இந்த வசதி இல்லை. வரதராஜப்பெருமாள் கோவிலில் கூட்டம் அதிகமாக இருப்பதால், உடமைகளுடன் நீண்ட நேரம் நிற்க முடியவில்லை. வெளியூர் பக்தர்களுக்காக, உடமைகளை பாதுகாக்கும் வசதியை செய்து தர வேண்டும். என்.மகாதேவன், தாம்பரம்