ஆத்தூர்: சங்கடஹர சதுர்த்தி யொட்டி, வெள்ளை விநாயகருக்கு சிறப்பு பூஜை நடந்தது. ஆத்தூர், வெள்ளை விநாயகர் கோவிலில், சங்கடஹர சதுர்த்தி சிறப்பு பூஜை, நேற்று நடந்தது. இரவு, 7:30 மணிக்கு, மூலவர் விநாயகருக்கு, சிறப்பு அபிஷேகம், வெள்ளி கவசம், அருகம்புல் மாலை மற்றும் வண்ண மலர்கள் அணிவித்து, தீபாராதனை நடந்தது. அதேநேரம், உற்சவர் வெள்ளை விநாயகருக்கு, சிறப்பு தீபாராதனை நடந்தது. உற்சவர், சிறப்பு அலங்காரத்தில், மூஷிகவாகனத்தில் கோவில் வளாக உட்புறம், மூன்று முறை வலம்வந்து, பக்தர்களுக்கு அருள்பாலித்தார். திரளான பக்தர்கள், சுவாமியை வழிபட்டனர். அதேபோல், ராணிப்பேட்டை செல்வவிநாயகர், கடைவீதி விநாயகர், விநாயகபுரம் விநாயகர், கோட்டை தலையாட்டி விநாயகர் கோவில்களில், சங்கடஹர சதுர்த்தி பூஜை நடந்தது.

* சேலம், அரியானூர், மகா கணபதி கோவிலில், நேற்று காலை சிறப்பு அபி?ஷகம் செய்து, மூலவர், வெள்ளி கவசத்தில் பக்தர்களுக்கு அருள்பாலித்தார். மாலை, சிறப்பு பூஜையில் திரளான பக்தர்கள் கலந்து கொண்டு சுவாமி தரிசனம் செய்தனர். மேலும், ஆட்டையாம்பட்டி கை.புதூர் ராஜகணபதி கோவிலில், சிறப்பு பூஜை நடந்தது.