விருத்தாசலம் : கோணாங்குப்பம் பெரியநாயகி அன்னை ஆலய ஆண்டு திருவிழாவின் ஆடம்பர தேர்பவனி வெகு விமர்சையாக நடந்தது. விருத்தாசலம், மங்கலம்பேட்டை அடுத்த கோணாங்குப்பம் கிராமத்தில் மிகவும் பழமை வாய்ந்த புனித பெரியநாயகி அன்னை ஆலயம் உள்ளது. இந்த ஆலயத்தின் ஆண்டு திருவிழா ஆண்டுதோறும் ஜனவரி 14ம் தேதி கொடியேற்றத்துடன் தொடங்கி ஜனவரி 23ம் தேதி வரை நடைபெறும். அதன்படி இந்த ஆண்டிற்கான ஆண்டு திருவிழா கடந்த 14ம் தேதி கொடியேற்றத்துடன் தொடங்கியது. தொடர்ந்து தினமும் திருப்பலி, நற்கருணை ஆராதனைகள், ஜெபக்கூடங்கள் நடந்தன. முக்கிய விழாவான ஆடம்பர தேர்பவனி நேற்று முன்தினம் இரவு 9 மணிக்கு நடந்தது. மின் விளக்குகளால் அலங்கரிக்கப்பட்ட தேரில் பெரியநாயகி அன்னை ஆலய வெளிப்புற வளாகத்தில் பவனி வந்தார். ஆலய வளாகத்தை தேர் சுற்றியபோது நடந்த வாணவேடிக்கைகள் கண்கொள்ளாக் காட்சியாக இருந்தது. தேர்பவனியைக் காண தமிழகத்தின் பல்வேறு மாவட்டங்கள் மற்றும் வெளி மாநிலங்களில் இருந்தும் ஆயிரக்கணக்கானோர் பங்கேற்றனர். தேர் பவனி முடிந்து மக்கள் ஆலயத்திற்குச் சென்று மெழுகுவர்த்தி ஏற்றி வழிபட்டனர்.