சித்திரை திருவிழாவின் மூன்றாம் நாளான இன்று சுந்தரேஸ்வரர் கைலாச பர்வத வாகனத்திலும், மீனாட்சி காமதேனு வாகனத்திலும் பவனி வருகின்றனர்.

ராவணன் ஆணவத்தால் சிவபெருமானின் இருப்பிடமான கயிலை மலையைப் பெயர்க்க முயன்றான். அவன் செருக்கை அடக்க எண்ணிய சிவன், கால் கட்டை விரலால் அழுத்த மலையின் அடியில் சிக்கினான். எவ்வளவு முயன்றும் தப்ப முடியவில்லை. பின்னர்  தவறை உணர்ந்து, ‘இறைவா! என் பிழையைப் பொறுத்தருள்க” என வேண்ட சிவன் மனமிரங்கி விடுவித்தார். உடல் பலம், செல்வ வளம் இவற்றின் காரணமாக மனிதன் ஆணவம் கொள்கிறான். அதைப் போக்க சிவன் கைலாய பர்வத வாகனத்தில் பவனி வருகிறார். இவரைத் தரிசித்தால் ஆணவம் விலகி நல்ல புத்தி உண்டாகும். தேவலோகத்திலுள்ள பசு காமதேனு. கேட்டதை வழங்கும் தன்மை கொண்டது. பால் சுரந்து பசி தீர்க்கும் பசு போல, மீனாட்சியும் நமக்கு வேண்டும் வரம் அளிக்க காமதேனுவில் பவனி வருகிறாள். இதை மனதில் கொண்டு, மாசி வீதிகளில் பவனி வரும் மீனாட்சி சுந்தரேஸ்வரரைத் தரிசித்து மகிழ்வோம்.