காஞ்சிபுரம்: மாற்றுத்திறனாளிகள், முதியோர், கைக்குழந்தை வைத்திருப்போர் வசதிக்காக, ஆன்லைன் சேவை துவக்கப்பட உள்ளது. இச்சேவை நடைமுறைக்கு வந்ததும், இவர்கள், அத்தி வரதரை விரைவாக தரிசிக்கலாம், என, கலெக்டர், பொன்னையா தெரிவித்துள்ளார். காஞ்சிபுரம் வரதராஜ பெருமாள் கோவிலில், அத்தி வரதர் வைபவம், வெகு விமரிசையாக நடைபெறுகிறது.அடிப்படை வசதிநேற்று காலை, கேரள கவர்னர், சதாசிவம், குடும்பத்துடன் வந்து, அத்தி வரதரை தரிசனம் செய்தார்.

இந்நிலையில், கோவிலுக்கு வரும், பக்தர்களுக்கான அடுத்தகட்ட வசதி குறித்து, கலெக்டர், பொன்னையா, நிருபர்களிடம் நேற்று கூறியதாவது:பக்தர்கள் வருகை, தினமும் அதிகரிக்கிறது. நேற்று முன்தினம் மட்டும், 2.5 லட்சம் பேர், அத்தி வரதரை தரிசித்துள்ளனர். வாரந்தோறும், மாவட்ட அதிகாரிகள் கூட்டம் நடத்தி, பக்தர்களுக்கான அடிப்படை வசதிகள் குறித்து ஆலோசிக்கப்படுகிறது.பகலில் குவிந்த குப்பையை, இரவில், நான்கு மணி நேரத்தில் அகற்றுகிறோம். நகரில், 20 மினி பஸ் இயக்கப்பட்டது; 30 ஆக அதிகரித்துள்ளோம்.எட்டு மொபைல் ஆம்புலன்ஸ், 10 பைக் ஆம்புலன்ஸ் ஆகியவை, தயார் நிலையில் நிறுத்தப்பட்டுள்ளன.