அழகர்கோவில் : அழகர்கோவில் சித்திரை திருவிழா இன்று துவங்குகிறது. மே 6ல் வைகை ஆற்றில் இறங்குவதற்காக, மலையில் இருந்து, மே 4ல், அழகர் மதுரைக்கு புறப்படுகிறார். விழாவின் முதல் இரண்டு நாட்களும் அழகர்கோயில் சுந்தரராஜ பெருமாள் பல்லக்கில், கோயிலை வலம் வருகிறார்.

405 மண்டகபடிகள்: வைகை ஆற்றில் இறங்கும் நிகழ்ச்சிக்காக மே 4ல் பட்டு உடுத்தி, கையில் வேல் கம்புடன், கள்ளழகர் வேடத்தில் தங்கப் பல்லக்கில் மதுரைக்கு புறப்படுகிறார். வரும் வழியில் 405 மண்டகப்படிகளில் எழுந்தருளுகிறார். மே 5 காலை 6 மணிக்கு மூன்றுமாவடியில், காலை 9 மணிக்கு புதூரில், மாலை 5 மணிக்கு தல்லாகுளத்தில் எதிர்சேவை நடக்கிறது. இரவு 12 மணிக்கு தல்லாகுளம் பெருமாள் கோயிலில் திருமஞ்சனம் நடக்கிறது. மே 6 அதிகாலை 2 மணிக்கு, ஸ்ரீவில்லிபுத்தூர் ஆண்டாள் சூடிக் கொடுத்த மாலையை ஏற்று, தங்க குதிரை வாகனத்தில் புறப்படும் அழகர், காலை 3 மணிக்கு ஆயிரம் பொன் சப்பரத்தில் எழுந்தருளுகிறார்.

வைகையில் அழகர்: வைகை ஆற்றில் இறங்குவதற்காக தங்க குதிரை வாகனத்தில் புறப்படும் அழகர், வழியில் உள்ள மண்டகபடிகளில் எழுந்தருளுகிறார். காலை 5.45 -6.15 மணிக்குள் ஆற்றில் இறங்குகிறார். காலை 10 மணிக்கு ராமராயர் மண்டகப்படிக்கு வரும் அழகருக்கு, தீர்த்தவாரி நடக்கிறது. மாலை அங்கிருந்து புறப்பட்டு வண்டியூர் வீரராகவப் பெருமாள் கோவிலை அடைகிறார். மே 7ல் காலை சேஷ வாகனத்தில் புறப்பட்டு, தேனூர் மண்டபத்தில் மண்டூக மகரிஷிக்கு சாப விமோசனம் அளிக்கிறார். இரவு ராமராயர் மண்டபத்தில் தசாவதார நிகழ்ச்சி நடக்கிறது. மே 8 காலை மோகினி அவதாரத்தில் புறப்படும் அழகர், மே 9ம் தேதி அதிகாலை தல்லாகுளம் மன்னர் சேதுபதி மண்டபத்தில் பூப்பல்லக்கில் எழுந்தருளுகிறார். பின் புதூர் வழியாக அப்பன் திருப்பதி செல்கிறார். மே 10 காலை 10 மணிக்கு கோவிலை அடைகிறார். மறுநாள் உற்சவசாந்தியுடன் விழா நிறைவு பெறுகிறது.

வைகையில் தண்ணீர் : விழா ஏற்பாடுகள் குறித்து மதுரை மண்டல இணை கமிஷனர் பாஸ்கரன் கூறியதாவது: அழகர் ஆற்றில் இறங்கும் நிகழ்ச்சிக்காக, மே 5ல் மதுரைக்கு நீர் வரும்படி வைகையில் தண்ணீர் திறந்து விடுவதாக பொதுப்பணித்துறை அதிகாரிகள் தெரிவித்துள்ளனர். தற்போது அணைப் பகுதியில் தொடர் மழை பெய்து வருகிறது. வைகையில் நீர் பெருக்கு அதிகம் உள்ளதால் தானாகவே தண்ணீர் வரும் வாய்ப்பு உள்ளது. தமிழகத்தில் அதிக நாட்கள் நடக்கும் திருவிழா இதுதான். பக்தர்களை நேரில் சந்தித்து ஆசி வழங்குவதற்காக அழகர் 17 கி.மீ., பயணம் மேற்கொள்கிறார். ஆண்டுதோறும் பக்தர்கள் கூட்டம் அதிகரித்து வருவதால், மாவட்ட மற்றும் மாநகராட்சி நிர்வாகங்கள் சார்பில் பக்தர்களுக்கு அடிப்படை வசதிகளும், பாதுகாப்பு வசதிகளும் செய்துள்ளோம். அழகர் ஆற்றில் இறங்கும் நிகழ்ச்சியை பக்தர்கள் காணும் வகையில் அழகர்கோயில், மாட்டுத்தாவணி, தல்லாகுளம், அண்ணா பஸ் ஸ்டாண்டு, வைகை ஆறு என ஐந்து இடங்களில் மெகா எல்.ஈ.டி., "டிவிக்கள் வைக்கப்படுகின்றன, என்றார்.