கும்மிடிப்பூண்டி:பெருவாயல் கிராமத்தில் உள்ள வாலி தீர்த்த குளத்தை துார் எடுத்து, சுற்றுச்சுவர் அமைக்க வேண்டும் என, கிராம மக்கள் கோரிக்கை விடுத்துள்ளனர்.கவரைப்பேட்டை அடுத்த, பெருவாயல் கிராமத்தில், ஹிந்து அறநிலைய துறை கட்டுப்பாட்டில், 1,000 ஆண்டுகள் பழமை வாய்ந்த சவுந்தரவல்லி சமேத திருவாலீஸ்வரர் கோவில் உள்ளது.கோவில் அருகே பரந்து, விரிந்து காணப்படும் வாலி தீர்த்த குளம் உள்ளது. அந்த குளத்தில், வாலி புனித நீராடி, அங்குள்ள சிவனை வழிபட்டதால், சிவனை திருவாலீஸ்வரர் என்றும், குளத்தை, வாலி தீர்த்தம் என்றும் பெயர் கொண்டு அழைக்கப்படுவதாக கூறப்படுகிறது.
அந்தக் குளத்தில், கழிவுகள், குப்பை கலந்து அசுத்தமாகி, பல இடங்களில் துார்ந்து போயுள்ளன. புதர்கள் மண்டியும், ஆகாயத் தாமரை படர்ந்தும் காணப்படுகிறது.குளத்தை துார் எடுத்து, சுற்றுச்சுவர் அமைக்க வேண்டும் என, பல ஆண்டுகளாக கோரிக்கை விடுக்கப்பட்டு வருகிறது.கிராமத்தின், முக்கிய நீராதாரமான அந்த குளத்தை சீரமைத்து, முறையாக பராமரிக்க வேண்டும் என, கிராம மக்கள் கோரிக்கை விடுத்து உள்ளனர்.