திருச்சி: ஸ்ரீரங்கம் அம்மா மண்டபம் படித்துறை, நேற்று மீண்டும் மூடப்பட்டது. திருச்சி, ஸ்ரீரங்கம் வழியாக செல்லும் காவிரி ஆற்றின் கரையில், அம்மா மண்டபம் உள்ளது. இங்கு, ஸ்ரீரங்கம் கோவில் உற்சவங்கள் நடைபெறும் போது, ரெங்கநாதர் எழுந்தருளுவார். இங்குள்ள படித்துறையில், இறந்தவர்களுக்கு கரும காரியங்கள் செய்வதாலும், அமாவாசை தினத்தில், முன்னோர்களுக்கு தர்ப்பணம் கொடுக்க ஏராளமானோர் வருவதாலும், எப்போதும் மக்கள் கூட்டம் காணப்படும். கொரோ வைரஸ் பரவாமல் தடுப்பதற்காக, மார்ச் மாதம் ஊரடங்கு அறிவித்தவுடன், அம்மா மண்டபமும் மூடப்பட்டது. தொடர்ந்து, 75 நாட்களுக்கும் மேலாக மூடப்பட்டிருந்த அம்மா மண்டபம் படித்துறை, கடந்த 9ம் தேதி திறக்கப்பட்டது. நாளுக்கு நாள், அங்கு வருவோர் எண்ணிக்கை அதிகரித்ததால், சமூக விலகல் போன்ற விதிமுறைகள் பின்பற்றப்படவில்லை. அதனால், மீண்டும் நேற்று முதல், அம்மா மண்டபம் படித்துறை மூடப்பட்டு, போலீஸ் பாதுகாப்பு போடப்பட்டது.