பல்லடம்: பழனி மலை முருகன் கோவிலில், பழுதான சக்திவேலை புதுப்பிக்க நடவடிக்கை எடுக்க வேண்டும் என, பல்லடம் அருகே முருக பக்தர்கள் கோரிக்கை விடுத்துள்ளனர்.

திருப்பூர் மாவட்டம், பல்லடம் அடுத்த இடுவாய் ஓம் சரவணா காவடி குழுவின் சார்பில், அறநிலையத் துறை அமைச்சர் சேகர் பாபுவுக்கு அனுப்பப்பட்டுள்ள கோரிக்கை மனு: திருப்பூர், கோவை, ஈரோடு, நீலகிரி உள்ளிட்ட பல்வேறு மாவட்டங்களில் இருந்து, பல லட்சம் பக்தர்கள் பாதயாத்திரையாக விரதம் இருந்து, பழனி முருகன் கோவிலுக்கு வருகை தருகிறோம். கோவிலில், மூலவருக்கு நேர் முன்பாக, வெளிப்பிரகாரத்தில் சக்திவேல் அமைக்கப்பட்டுள்ளது. விரதம் இருப்பவர்கள், பழம்பெருமை வாய்ந்த இந்த சக்திவேல் முன்‌பாக, விரத மாலையை சமர்ப்பிப்பது வழக்கம். அவ்வாறு, கடந்த, 46 ஆண்டுகளாக நாங்களும் இந்த வழிமுறையை கடைபிடித்து வருகிறோம்.

பல ஆண்டுகளாக பராமரிக்கப்படாமல் சக்திவேல் பழுதாகி உள்ளது. முருகனின் அறுபடை வீடுகளில் முக்கிய ஸ்தலமாக உள்ள பழனி கோவில் சக்திவேல் பழுதாகி இருப்பது வேதனை அளிக்கிறது. சக்திவேலை புதுப்பிக்கக் கோரி கடந்த மூன்று ஆண்டாக அதிகாரிகளிடம் மனு அளித்தும் நடவடிக்கை எடுக்கப்படவில்லை. எனவே, பழனி கோவில் அபிஷேகம் நடைபெறுவதற்கு முன், சக்திவேலை புதுப்பிக்க நடவடிக்கை எடுக்க வேண்டும். இவ்வாறு அந்த மனுவில் கூறப்பட்டுள்ளது.