மண்டலபூஜை முடிந்து கடந்த 26–ம் தேதி இரவு நடை அடைக்கப்பட்டது. தொடர்ந்து துப்புரவு பணியாளர்கள், போலீசார், தீயணைப்புத்துறையினர் இணைந்து சன்னிதானம் மற்றும் பம்பை சுற்றுப்புறங்களை துாய்மை படுத்தினர். பிரசாதம் தயாரிக்கும் பணியும் இடைவெளியின்றி நடைபெற்றது. நேற்று மதியம் ஸ்ரீகோயில் மற்றும் 18 படிகள் தண்ணீரால் சுத்தம் செய்யப்பட்டது. மாலை 5:00 மணிக்கு மேல்சாந்தி பரமேஸ்வரன் நம்பூதிரி நடை திறந்து தீபம் ஏற்றினார். தொடர்ந்து 18 படிகள் வழியாக இறங்கி சென்று ஆழிகுண்டத்தில் நெருப்பு வளர்த்தார். நேற்று பக்தர்களுக்கு அனுமதி இல்லாததால் ஊழியர்கள் மட்டுமே காணப்பட்டனர். இரவு 10:00 மணிக்கு நடை அடைக்கப்பட்டது. இன்று அதிகாலை 4:00 மணிக்கு நடை திறந்ததும் அபிேஷகம் நடத்தப்பட்டு, தந்திரி கண்டரரு மகேஷ் மோகனரரு நெய்யபிஷகத்தை தொடங்கி வைப்பார்.

பின்னர் வழக்கமான பூஜைகள் நடைபெறும். பக்தர்கள் கூட்டம் அதிகமாக இருக்கும் என்பதால் மகரவிளக்கு நாள் வரை உதயாஸ்தமன பூஜை மற்றும் படிபூஜை கிடையாது என்று தேவசம்போர்டு அறிவித்துள்ளது. எல்லா நாட்களிலும் காலை 11.30 மணி வரை நெய்யபிேஷகம் நடைபெறும். 12:00 மணிக்கு களபபாபிேஷகம் நடைபெறும். மகரஜோதிக்கு முன்னோடியாக பிரசித்தி பெற்ற எருமேலி பேட்டை துள்ளல் ஜன., 11, பந்தளத்தில் இருந்து திருவாபரணம் புறப்பாடு 12 தேதிகளில் நடைபெறும். 13–ல் சுத்திகிரியைகள் நடைபெறும். 14–ம் தேதி மகரஜோதி தரிசனம் நடைபெறும். பெருவழிப்பாதை: கடந்த இரண்டு ஆண்டுகளாக அடைக்கப்பட்டுள்ள பெருவழிப்பாதை இன்று முதல் திறக்கப்படுகிறது. தினமும் அதிகாலை 5:30 முதல் காலை 10:30 வரை எருமேலியில் இருந்து இந்த பாதையில் பக்தர்கள் அனுமதிக்கப்படுவார்கள். அழுதை, முக்குழியில் பகல் 12:00 வரை அனுமதி உண்டு. இங்கு பக்தர்களின் ஆவணங்கள் சரிபார்க்கப்படும். பக்தர்கள் தனியாக வந்தாலும் அவர்கள் குழுக்களுடன் இணைத்து அனுப்பப்படுவார்கள். மாலை 5:00 மணிக்கு பின்னர் பயணிக்க முடியாது. வலியான வட்டம், கரிமலை, கல்லிடும்குன்று ஆகிய இடங்களில் தங்கும் வசதி உண்டு. வனத்துறை சார்பில் எட்டு இடங்களில் கடைகள் திறக்கப்பட்டுள்ளது. முக்குழி மற்றும் கரிமலையில் மருத்துவமனை திறக்கப்பட்டுள்ளது. மாம்பாடி, கல்லிடும்குன்று, கரியிலாம்தோடு, மஞ்சள்பொடிதட்டு ஆகிய இடங்களில் மருத்துவ உதவி மையம் திறக்கப்பட்டுள்ளது. இன்று முதல் இரண்டாம் தேதி வரை கேரளாவில்இரவு நேர ஊரடங்கு அமல்படுத்தப் பட்டிருந்தாலும் சபரிமலை செல்லும் பக்தர்களுக்கு விதிவிலக்கு அளிக்கப்பட்டுள்ளது.